Qoraqalpog‘istonning Nukus shahrida Cobalt haydovchisi maktab o‘quvchisini urib, qochib ketdi. Bu haqda “Millar” dasturida xabar berildi.
Unga ko‘ra, holat 4-fevral kuni sodir bo‘lgan. Haydovchi piyodani urib, voqea joyidan qochib ketgan holati esa mashinalarning kuzatuv kameralariga tushib qolgan. U o‘z aybiga iqrorlik bildirib, qo‘rqqani sababli ketib qolganini aytdi.
“Nukus shahridagi ko‘chadan ketayotgan paytimda maktab o‘quvchisini ko‘rmasdan urib yubordim. To‘g‘risi, qo‘rqqanimdan voqea joyidan qochib ketdim. Boshqa bu kabi qoidabuzarlik qilmaslikka va‘da beraman”, deydi haydovchi.
Hozirda avtomashina topilib, jarima maydonchasiga joylashtirilgan. Hodisa yuzasidan surishtiruv ishlari davom etmoqda.
- Avvalroq Toshkent shahar Yashnobod tumanida Captiva urib yuborgan piyoda voqea joyida halok bo‘lgandi.
- Shuningdek, Samarqandda “KamAZ” ayol va uning ikki farzandini urib yuborishi oqibatida bolalar voqea joyida halok bo‘lgani to‘g‘risida xabar berilgan edi.
Bundan tashqari, 19-yanvar kuni Navoiyda 16 yoshli bola otasining mashinasida YPX xodimini urib yuborib, uning o‘limiga sababchi bo‘lgandi.
O‘zbekistonda 2024-yilda 26 mingdan ortiq shaxs yo‘l harakatini buzib, o‘zgalarga jabr yetkazgani uchun javobgarlikka tortildi. 2024-yili jami 9364 ta yo‘l-transport hodisasi rasman qayd etilgani haqida xabar berilgandi.
Yo‘llarda bolalar o‘limi
Noyabr oyida Jizzax viloyatining Baxmal tumanida Cobalt katta tezlikda voyaga yetmagan ikki qizni urib yubordi. Shuningdek, Samarqandda avtobus maktab yaqinida yo‘lni kesib o‘tayotgan bolani urib yuborib, uning o‘limiga sabab bo‘lgandi. Surxondaryoda 1-sinf o‘quvchisi Nexia urib yuborishidan vafot etgandi.
Senat bergan ma’lumotga ko‘ra, 2024-yilning 5 oyi davomida jami 359 nafar o‘quvchi bilan bog‘liq yo‘l-transport hodisasi sodir etilgan va 65 nafar o‘quvchi halok bo‘lgan, 294 nafar o‘quvchi esa turli darajada tan jarohatlari olgan. 2023-yilda bolalar bilan bog‘liq 1 794 ta YTH yuz berib, ularda 1 568 nafar bola jarohatlangan, 263 nafari vafot etgan.
Sentyabrda Toshkentda BYD 9 yoshli maktab o‘quvchisini urib yuborib, uning o‘limiga sababchi bo‘lgandi. Xuddi shu kabi holat iyul oyida Navoiy viloyati Xatirchi tumanida sodir bo‘lgan. Katta tezlikda harakatlanayotgan BYD piyodalar o‘tish joyidan o‘tayotgan 9 yoshli qizaloqni bosib ketgan. O‘sha oyda Samarqandda 7 yashar bola avtomobil urib ketishi oqibatida vafot etdi. Aprelda Jizzaxda sodir bo‘lgan YTH oqibatida ikki nafar maktab o‘quvchisi halok bo‘ldi.
Bolalar ishtirokida ayanchli YTHlar ko‘paygach, jamoat faollari yo‘llarda bolalar o‘limi uchun siyosiy javobgarlik bo‘lishi kerakligini aytdi.
Izoh (0)