Toshkent shahar Sergeli tumanida BYD 9 yoshli maktab o‘quvchisini urib yubordi. Bu haqda IIBB xabar berdi.
Keltirilishicha, holat 19-sentyabr kuni soat taxminan 13:45 larda Sergeli tumani, Fayzli Toshkent ko‘chasida sodir bo‘lgan. 1983-yilda tug‘ilgan M.A. BYD rusumli, davlat raqam belgisi 01 444 VFA bo‘lgan avtomashinada harakatlanib, piyodani urib yuborgan.
Yo‘l-transport hodisasi natijasida voyaga yetmagan 2015-yilda tug‘ilgan L.S. olgan tan jarohatlari sababli kasalxonaga olib borilgan vaqtda vafot etgan.
Mazkur holat yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Xuddi shu kabi holat 1-iyul kuni Navoiy viloyati Xatirchi tumanida sodir bo‘lgan. 140 km/soat tezlikda harakatlanayotgan BYD rusumidagi avtomobil tartibga solinmagan piyodalar o‘tish joyidan o‘tayotgan 9 yoshli qizaloqni bosib ketib, uning bevaqt o‘limiga sabab bo‘lgandi.
Bundan tashqari, 3-iyul kuni Samarqand tumanida Nexia-2 rusumli avtomobil yo‘lning belgilanmagan qismidan yugurib o‘tayotgan 7 yoshli bolani urib yuborgan. Ushbu hodisa oqibatida esa 2017-yilda tug‘ilgan bola ko‘rsatilgan tibbiy muolajalarga qaramasdan shifoxonada bevaqt hayotdan ko‘z yumgan.
5 oyda 65 nafar maktab o‘quvchisi…
Oliy Majlis Senatining Mudofaa va xavfsizlik masalalari qo‘mitasining taqdim etgan maʼlumotlariga ko‘ra, 2024-yilning besh oyida sodir bo‘lgan yo‘l-transport hodisalarining 53,7 foizi piyoda va velosipedchilar bilan bog‘liq holatlar hissasiga to‘g‘ri kelgan.
Bundan tashqari, umumiy o‘rta taʼlim maktablarining 9 548 tasi transport qatnovi ko‘p hududlarda joylashgan va aksariyat maktablar oldida piyodalar uchun yo‘laklar mavjud emas, tegishli svetoforlar o‘rnatilmagan. Buning oqibatida 2024-yilning 5 oyi davomida jami 359 nafar o‘quvchi bilan bog‘liq yo‘l-transport hodisasi sodir etilgan va 65 nafar o‘quvchi halok bo‘lgan, 294 nafar o‘quvchi esa turli darajada tan jarohatlari olgan.
Qo‘mita maʼlumotlariga ko‘ra, 2023-yilda bolalar bilan bog‘liq 1 794 ta yo‘l-transport hodisasi sodir etilib, ularda 1 568 nafar bola jarohatlangan va 263 nafar bola hayotdan erta ko‘z yumgan.
Izoh (0)