Jizzax viloyati, G‘allaorol tumanidagi “Oqtom” mahallasi hududidan o‘tgan yo‘lda 15-aprel kuni soat 12:40 larda YTH sodir bo‘ldi. Bu haqda viloyat yo‘l harakati xavfsizlik boshqarmasi xabar berdi.
Maʼlum qilinishicha, Baxmal tumanida yashovchi 26 yoshli haydovchi o‘ziga tegishli Lacetti avtomashinasida belgilangan tezlikka amal qilmasdan, rul boshqaruvini yo‘qotib, qarama-qarshi yo‘nalishda harakatlanib ketayotgan 5- hamda 7-sinf o‘quvchilarini urib yuborgan.
“100 km/soat tezlikda ketayotgandim, boshqaruvni yo‘qotdim, keyin bolalarni urib ketdim. Qolgani esimda yo‘q. Bunaqa bo‘lishini bilmagandim”, – deydi haydovchi.
Avtomashina yo‘l chetidagi uy devoriga borib urilgan. Oqibatda o‘sha yerdagi qoramolning ham joni uzilgan.
Surishtiruv davomida erkak 2023-yilning dekabr oyidan bugunga qadar 11 marta yo‘l harakati qoidalarini buzgan. Holat yuzasidan tergov harakatlari boshlangan. Jinoyat kodeksining 266-moddasi, 3-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, haydovchiga nisbatan qamoqqa olish ehtiyot chorasi qo‘llanilgan.
Izoh (0)