Toshkentda piyoda urib yuborilishiga sabab bo‘lgan yo‘l-transport hodisasini yuzaga keltirib, voqea joyidan qochib ketgan Spark haydovchisining shaxsini aniqlash choralari ko‘rilayotgani to‘g‘risida xabar berilgandi. Poytaxt IIBBning ma’lum qilishicha, mazkur avtomobil haydovchisi topilgan va mashina jarima maydoniga joylashtirilgan.
Ijtimoiy tarmoqlarda Spark avtomobili yo‘l qoidasini buzgan holda, asosiy yo‘ldan harakatlanib ketayotgan mashina ustuvorligini e’tiborga olmasdan qayrilib olayotgani tasvirlangan video tarqalgan edi. Ma’lum qilinishicha, videoda tasvirlangan holat 3-oktabr kuni, taxminan, soat 11:00 da Bektemir tumani THAY ko‘chasida sodir bo‘lgan. Spark’ning bu kabi harakati natijasida Cobalt avtomobilining 49 yoshli haydovchisi K.K. to‘qnashuvni chetlab o‘tmoqchi bo‘lib, rulni o‘ng tomonga burgan va piyoda — 1987-yilda tug‘ilgan P.B.ni urib yuborgan. Oqibatda piyoda badan shikastlari bilan shifoxonaga yetkazilgan.
Tezkor-tergov tadbirlari davomida aniqlanishicha, voqea joyini tark etgan Spark avtomobilini haydovchilik guvohnomasi bo‘lmagan 39 yoshli S.I. ismli ayol boshqargan.
Hozirga vaqtda unga nisbatan Ma’muriy javobgarlik to‘g‘risidagi kodeksning tegishli moddalari bo‘yicha bayonnoma rasmiylashtirilgan va avtomobil jarima maydonchasiga joylashtirilgan.
“Mazkur fakt asosida olib borilgan tergovoldi harakatlari davom etmoqda. Faktlar aniqlangach, yo‘l-transport hodisasi barcha ishtirokchilarining harakatlariga huquqiy baho beriladi”, — deyiladi xabarda.
Avvalroq Qashqadaryoda piyoda o‘limiga sababchi bo‘lgan Nexia haydovchisi voqea joyidan yashiringani, Andijonda Spark ikki nafar voyaga yetmagan qizni urib ketgani to‘g‘risida xabar berilgandi.
Mavzuga doir:
- Avtomobilda ayolni turtib ketgan haydovchi videosi bo‘yicha izoh berildi
- Sirdaryoda Nexia piyodani urib, voqea joyidan qochib ketdi. Jabrlanuvchi hodisa joyida vafot etdi
- Аndijonda voyaga yetmagan bola boshqaruvidagi avtomobil ishtirokida YTH sodir bo‘ldi. Oqibatda haydovchining 13 yoshli ukasi vafot etdi
Izoh (0)