Toshkent viloyatida piyodani urib yuborib, voqea joyidan qochib ketgan yuk mashinasi egasi qidirilmoqda. Bu haqda Toshkent viloyati IIBB YHXB matbuot xizmati “Daryo”ga ma’lum qildi.
Ma’lumotlarga ko‘ra, 17-dekabr kuni soat 02:00 va 03:00 lar orasida A-373 Guliston—Ohangaron avtomobil yo‘lining Piskent tumani hududidan o‘tgan 87-kilometrida, ya’ni yoqilg‘i quyish shoxobchasi atrofida noma’lum transport vositasi 25-28 yoshlar atrofida bo‘lgan piyodani urib yuborgan. Haydovchi jabrlanuvchiga yordam ko‘rsatmasdan voqea joyidan qochib ketgan.
Piyoda olingan tan jarohatlari oqibatida vafot etgan. Marhumning shaxsiga aniqlik kiritilgan — u Olmaliq shahrida yashovchi 36 yoshli erkak bo‘lgan.
Voqea sodir bo‘lgan joyni o‘rganish asosida u yerdan yuk mashinasiga taalluqliligi taxmin qilinayotgan bir necha ashyoviy dalillar topilgan. Yo‘lning asfalt qoplamasidagi tormoz izlari ham yuk mashinasiga tegishli ekanligi taxmin qilinmoqda. Hozirda ushbu transport vositasini topish bo‘yicha qidiruv va surishtiruv ishlari olib borilmoqda.
Toshkent viloyati IIBB YHXB ushbu voqeani ko‘rgan yoki eshitgan fuqarolardan (71) 265-08-51 yoki 265-96-53 telefon raqamlariga qo‘ng‘iroq qilib ma’lumot berishlarini, jinoyatni fosh etilishiga hissa qo‘shishlarini so‘raydi. Ta’kidlanishicha, ma’lumot bergan fuqarolarning shaxsi oshkor etilmaydi va sir saqlanadi.
“Shuningdek, voqeani sodir etgan haydovchi aybiga iqror bo‘lib, ichki ishlar organiga kelsa, u o‘ziga nisbatan qo‘llaniladigan jazoni yengillashtirish imkoniga ega bo‘ladi”, deyiladi xabarda.
Mavzuga doir:
Izoh (0)