Farg‘onada Nexia bilan to‘qnashgan Tracker yonib ketdi

Farg‘onada Nexia bilan to‘qnashgan Tracker avtomobili yonib ketdi, deya xabar bermoqda YHXBB.

Ma’lum qilinishicha, 2020-yilning 26-dekabr kuni soat 05:30 larda Farg‘ona viloyati Buvayda tumani hududidan o‘tgan A-373 Toshkent—O‘sh avtomobil yo‘lining 313-kilometrida haydovchi, 1975-yilda tug‘ilgan B.A. Tracker rusumli avtomobilni boshqarib ketayotib, ehtiyotsizligi oqibatida o‘zi bilan bir yo‘nalishda, oldinda harakatlanib ketayotgan haydovchi, 1997-yilda tug‘ilgan U.B. boshqaruvidagi Nexia rusumli avtomobilning orqa qismiga borib urilgan.

YTH oqibatida Tracker rusumli avtomobilda yong‘in yuzaga kelgan.

To‘qnashuv natijasida Nexia rusumli avtomobil yo‘lovchisi, 21 yoshli M.B. tan jarohati olib shifoxonaga yotqizilgan.

Mazkur YTH yuzasidan tuman IIB TB tomonidan Jinoyat kodeksining 266-moddasi 1-qismiga ko‘ra (transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish badanga o‘rtacha og‘ir yoki og‘ir shikast yetkazilishiga sabab bo‘lishi) jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Namanganda 4 nafar o‘smir sayr qilib kelish bahonasida Spark’ni olib qochib, YTHga uchragani, Samarqandda 14 yoshli bola boshqaruvidagi Tracker YTHga uchrashi oqibatida haydovchining tengdoshi vafot etgani hamda Paxtachida yo‘lni belgilanmagan joydan kesib o‘tayotgan piyodani Spark urib ketgani haqida xabar berilgandi.