Qarshi magistral kanalidan foydalanish boshqarmasi tomonidan 2024-yilda o‘tkazilgan tenderlar asosida boshqarmaga qo‘shni firma tomonidan salkam 8 milliard so‘mlik ish bajarilgani, shuningdek, ushbu firma bilan jami 5 ta 2,5 milliard so‘mlik to‘g‘ridan to‘g‘ri shartnoma imzolangani haqida xabar berilgan edi. Mazkur holat yuzasidan Raqobatni rivojlantirish va iste’molchilar huquqlarini himoya qilish qo‘mitasi axborot xizmati munosabat bildirdi.
Ma’lum qilinishicha, qo‘mitaning Qashqadaryo viloyati hududiy boshqarmasi tomonidan “Qarshi magistral kanalidan foydalanish boshqarmasi” DM tomonidan amalga oshirilgan davlat xaridlarida raqobat qonunchiligi talablariga rioya qilinganligi yuzasidan o‘rganish ishlari o‘tkazilgan.
O‘rganishlar natijasida Buyurtmachi tomonidan eng yaxshi takliflarni tanlash orqali amalga oshirilgan davlat xaridlarida “Raqobat to‘g‘risida”gi qonun talablari buzilishi alomatlari bilan buyurtmachiga nisbatan ish qo‘zg‘atilib, natijasi yuzasidan qonunbuzilishi holatlariga yo‘l qo‘ymaslik bo‘yicha bajarilishi majburiy bo‘lgan ko‘rsatma berilgan.
“Buyurtmachi (Qarshi magistral kanalidan foydalanish boshqarmasi) mansabdor shaxsiga nisbatan ma’muriy bayonnoma rasmiylashtirildi. Shu bilan birgalikda, o‘rganish davomida kuzatilgan manfaatlar to‘qnashuvi alomatlari bo‘yicha ma’lumotlarga huquqiy baho berilishi uchun prokuratura organlariga yuborildi”, deyiladi munosabatda.
Avvalroq “Xalq banki” Surxondaryo viloyati Boysun, Uzun, Muzrabot va Oltinsoy tumanlarida joylashgan bank binolarini ta’mirlash bo‘yicha tenderlar o‘tkazgani, ularda aka-ukalarga tegishli qurilish kompaniyalari raqobatlashgani haqida xabar berilgan edi. Mazkur holat yuzasidan Korrupsiyaga qarshi kurashish agentligi tomonidan yuqoridagi qonunbuzilishi holatlarini bartaraf etish va kelgusida oldini olish yuzasidan O‘zbekiston Respublikasi Markaziy bankiga taqdimnoma kiritilgani ma’lum qilingandi.
Izoh (0)