“Daryo” internet-nashrida Qashqadaryo viloyati Koson tumani obodonlashtirish boshqarmasi mart oyida tumandagi markaziy archaga bezaklar sotib olish bo‘yicha 262 million so‘mlik tender o‘tkazgani haqida xabar berilgandi. Korrupsiyaga qarshi kurashish agentligi holatga munosabat bildirdi.
Ma’lum qilinishicha, o‘rganish natijasida Koson tuman obodonlashtirish boshqarmasi buyurtmachiligida “Archa o‘yinchoqlari” xaridi uchun 27-mart kuni o‘tkazilgan davlat xaridida “Davlat xaridlari to‘g‘risida”gi qonunning 7-moddasi (asoslanganlik prinsipi), 8-moddasi (moliyaviy mablag‘lardan foydalanishning oqilonaligi, tejamkorligi va samaradorligi prinsipi), 10-moddasi (raqobat va xolislik prinsipi), 14-moddasi (manfaatlar to‘qnashuvi), 26-moddasi (davlat xaridlari jarayoni) talablari buzilgani aniqlangan.
Xususan, davlat xaridlarini o‘tkazishning maqsadga muvofiqligi va zarurligi, maqbul muddatlarda o‘tkazish imkonini beradigan oqilona va tejamkor usulda amalga oshirilishi kabi prinsiplariga zid varishda:
- davlat xaridlarini rejalashtirish;
- xarid qilish tartib-taomillarini amalga oshirish;
- shartnomani tuzish va bajarish bosqichlariga amal qilinmagan.
Oqibatda 2022-yil dekabr va 2023-yil yanvar oyida o‘tkazilgan Yangi yil bayrami uchun noqonuniy tarzda mart oyida “Archa o‘yinchoqlari” xarid qilish yuzasidan davlat xaridi o‘tkazilgan.
Mazkur holat bo‘yicha 31-mart kuni xarid komissiyasining bayonnomasini bekor qilish to‘g‘risida buyurtmachiga taqdimnoma kiritilgan va chora ko‘rish uchun to‘plangan hujjatlar Davlat moliyaviy nazorat inspeksiyasiga yuborilgan.
Agentlikning taqdimnomasiga binoan Koson tuman obodonlashtirish boshqarmasi tomonidan 4-aprel kuni Xarid komissiyasining bayonnomasi bekor qilingan.
Izoh (0)