“Yangi yil sovg‘asi”, bir xil familiyali raqobatchilar, soxtalashtirilgan savdo — 23-yanvardagi qiziqarli tenderlar
23-yanvar kuni O‘zbekiston Respublikasi tovar-xomashyo birjasida 100 ga yaqin tender savdolari amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Yangi yil sovg‘asi
Rossiya davlat neft va gaz universitetining Toshkent shahridagi filiali 11-yanvar kuni 165 ta “Yangi yil sovg‘asi” uchun 72,6 million so‘mlik tender o‘tkazgan. Har bir sovg‘aning boshlang‘ich narxi 440 ming so‘m etib belgilangan.
18-yanvar kuni yakunlangan tender natijalariga ko‘ra, Armada Azia Trade lotni yutib olgan. Shartnoma summasi — 59 million 400 ming so‘m.
“Chilonzor” metrosi uchun 8 million dollarlik uskuna
“Toshkent metropoliteni” davlat unitar korxonasi “Chilonzor” liniyasida interval nazoratini tashkil etish va harakatlanuvchi tarkibning xavfsizligini ta’minlash uchun maxsus mikroprotsessorli blokirovkalash uskunalari (MPC) xarid qildi. Lot ma’lumotlariga ko‘ra, uskunalarning yaroqlilik muddati 24 oy, yetkazib berish muddati 365 kun bo‘lishi belgilangan. Xarid mablag‘lari xalqaro moliyaviy manbalar tomonidan qoplanishi ko‘zda tutilgan.
Tenderni yuridik manzili Moskvada joylashgan “ТМХ Intellektualniye Sistemi” MCHJ yutib olgan. Shartnoma summasi esa 8 149 764 dollar.
Ilhomjon qizi vs Ilhomjon o‘g‘li
Toshkent irrigatsiya va qishloq xo‘jaligini mexanizatsiyalashgan muhandislari institutining Qarshi filiali huzuridagi akademik litsey tayyor issiq ovqat yetkazib berish bo‘yicha autsorsing xizmati uchun tender o‘tkazgan. Unda “Mohichehra Ilhom qizi” va “Suxrob Juraqobilov 505” MCHJlar raqobatlashgan va yakunda “Mohichehra Ilhom qizi” g‘olib deb topilgan.
Ochiq ma’lumotlarga ko‘ra, g‘olib tadbirkorlik subyektining manzili Qashqadaryo viloyati Qarshi tumanida joylashgan. Rahbari — Yusupova Uldon Murotovna.
Zaxira g‘olib MCHJning ta’sischisi esa Juraqobilov Suxrob Ilhom o‘g‘li deb ko‘rsatilgan. Suxrob Ilhom o‘g‘li va “Mohichehra Ilhom qizi” o‘rtasida qandaydir bog‘liqlik borligi haqida ma’lumotlar mavjud emas.
Qarindoshlar tenderni soxtalashtirdimi?
Jizzax viloyat Nogironlarni reablitatsiya qilish markazi ovqat yetkazib berish bo‘yicha autsorsing xizmati uchun 84 million so‘mlik tender e’lon qilgan. Unda Yaksart Inter Impeks MCHJ va “Mumin Ota 1954” MCHJ raqobatlashgan. Yakunda ikkinchi tadbirkorlik subyekti g‘olib deb topilgan.
Tender ishtirokchilarining rahbariyati bilan qiziqdik. Statistika agentligiga ko‘ra, “Mumin Ota 1954” MCHJning yagona ta’sischisi va rahbari Jo‘rayev Akbarjon Mo‘minjonovich hisoblanadi. Korxona manzili — Samarqand viloyati Toyloq tumani.
Zaxira g‘olib Yaksart Inter Imper MCHJning rahbari esa Jo‘rayev To‘lqinjon Mo‘minjonovich. Tadbirkorlik subyekti Sirdaryo viloyati Yangiyer shahrida joylashgan.
“Daryo” muxbiri ushbu ikki tadbirkor o‘rtasida yaqin qarindoshlik munosabatlari bor bo‘lishi mumkin degan gumonda Akbarjon Jo‘rayev bilan bog‘landi. Uning ta’kidlashicha esa, bu ismlari bir-biriga juda o‘xshash insonlarning bir tenderda raqobatchi sifatida qatnashib qolgani — oddiy tasodif. Akbarjon Jo‘rayev so‘zlari isboti sifatida uning korxonasi Samarqandda, raqibiniki esa Sirdaryoda joylashganini aytib o‘tdi. Balki.
Bir xil familiyali raqobatchilar
Xorazm viloyati Qo‘shko‘pir tuman 1-son ayrim fanlar chuqur o‘rganiladigan ixtisoslashtirilgan maktab-internati autsorsing xizmati uchun boshlang‘ich qiymati 112 million so‘mlik tender o‘tkazgan. Unda umumiy to‘rtta ishtirokchi qatnashgan va yakunda “Yangi Qo‘shko‘pir” xususiy korxonasi tenderni yutib olgan. Fast Foziljon MCHJ esa zaxira g‘olib sifatida ko‘rsatilgan.
“Yangi Qo‘shko‘pir” XKning ta’sischisi Jumaniyozov Ravshanbek Matsodiqovich. Rahbar esa Bekchanov Davronbek Kupalbayevich.
Qizig‘i, Fast Foziljon MCHJ ta’sischisining familiyasi ham Bekchanov.
Bekchanov Ilhom va Bekchanov Davronbekning qarindoshchilik aloqalari bo‘yicha ma’lumotlar yo‘q.
Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
