26-yanvar kuni O‘zbekiston Respublikasi tovar-xomashyo birjasida 100 dan ortiq tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Musiqiy asbob uchun 90 million so‘m
Qashqadaryo viloyati Qarshi shahridagi 9-son bolalar musiqa va san’at maktabi marimba musiqiy asbobi xarid qilish uchun boshlang‘ich qiymati 94 million so‘mlik tender o‘tkazdi. Eng yaxshi taklifni tanlab olish bo‘yicha o‘tkazilgan savdo 19-yanvardan 26-yanvargacha davom etdi.
Protokolga ko‘ra, mahsulotning yaroqlilik muddati bir yil bo‘lishi, 10 kun ichida yetkazib berilishi kerak.
Tenderda ikkita tadbirkorlik subyekti qatnashdi: Sios Shams MCHJ va Humo Music MCHJ.
Komissiya a’zolarining yakuniy baholariga ko‘ra, Humo Music MCHJ 100 ball bilan tenderni yutib olgan. Shartnoma summasi — 90 million so‘m.
G‘olib MCHJ rahbari va ustav fonddagi yagona ta’sischisi Subxanov Sanjar Naimkulovich. Korxona Qashqadaryo viloyati Koson tumani Koson shahri “Nartibaland” mahallasida joylashgan.
Zaxira g‘olib Sios Shams MCHJ rahbari esa — Kaxxarov Sanjar Norqulovich. E’tiborlisi, ushbu tadbirkorlik subyekti ham Qashqadaryo viloyati Koson tumani Koson shahri “Nartibaland“ mahallasida joylashgan.
Bir familiyali raqobatchilar
Samarqand viloyati Narpay tuman xalq ta’limi bo‘limi umumiy qiymati 60 million so‘m bo‘lgan ikkita tender o‘tkazgan. Biri nasos mahsulotlari, boshqasi havo so‘ruvchi ventilyator xaridi uchun.
Ikkala tenderni ham “Xasanov Elbek Grand” xususiy korxonasi yutib olgan.
Ushbu korxona rahbari Xasanov Elbek Taxirovich. Yuridik manzili Samarqand viloyati Narpay tumani Oqtosh shahrida joylashgan.
Ventilyator xarid qilish bo‘yicha o‘tkazilgan tenderda zaxira g‘olib sifatida ko‘rsatilgan “Narpay Broker” xususiy korxonasining rahbari esa Xasanova Dildora Ulug‘bek qizi. Tadbirkorlik subyekti Samarqand viloyati Narpay tumani Qorasiyrak QFYda joylashgan.
Xasanov Elbek va Xasanova Dildora o‘rtasida qarindoshlik aloqalari borligi haqida ma’lumotlar mavjud emas.
Tadbirkorning o‘yini
Sirdaryo Muruvvat uyi ovqat yetkazib berish bo‘yicha autsorsing xizmati uchun 330 million so‘mlik tender o‘tkazgan. Unda “Innovatsion Go‘sht Sut Trade” va New Inavatsion Pharm MCHJlar g‘oliblik uchun kurashgan.
Komissiya a’zolarining baholariga ko‘ra, 100 ga 78 ball bilan tenderni “Innovatsion Go‘sht Sut Trade” yutib oldi. Shartnoma summasi — 317 million so‘m.
Ishtirokchilarning rahbariyatlari bilan qiziqdik.
Ochiq ma’lumotlarga ko‘ra, g‘olib MCHJning rahbari va ta’sischisi Qurbonov Obidjon O‘rinovich hisoblanadi.
Shubhali jihati shundaki, tenderda unga raqobatchi bo‘lgan New Inavatsion Pharm MCHJ ta’sischisi ham aynan uning — Qurbonov Obidjon O‘rinovichning o‘zginasi.
Holat yuzasidan izoh olish uchun Obidjon Qurbonov bilan bog‘lanishga urindik, ammo tadbirkor go‘shakni ko‘tarmadi.
Mas’ullardan ushbu tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
Izoh (0)