Qashqadaryo viloyat sog‘liqni saqlash boshqarmasi boshlig‘i, “Dr Boboyev” klinikasi rahbari Alisher Boboyev Shahrisabzdagi sobiq “elektroset” binosini sotib olgani haqidagi xabarlar e’lon qilindi. Viloyat SSB mazkur xabarlar yuzasidan ma’lumot berdi.
Unga ko‘ra, markaz faoliyati bankdan olingan 500 ming AQSH dollari miqdoridagi kredit evaziga yo‘lga qo‘yilgan. Bu yerda urologiya yo‘nalishida vrachlar malakasini oshirish bo‘yicha mamlakatda yagona nodavlat o‘quv markazi hamda nodavlat tibbiyot muassasalari orasida yagona klinik ordinatura faoliyat ko‘rsatmoqda.
Klinika jamoasi o‘z faoliyatini yanada kengaytirishga ehtiyoj sezmoqda. Bu borada xorijiy hamkorlar bilan muzokaralar olib borilmoqda. Joy masalasida muammo kuzatilgani sababli ochiq tenderda, shaffof tarzda Shahrisabz shahridagi sobiq elektr ta’minoti korxonasi binosi sotib olinmoqda. Bu yerda kelgusida kardiologiya va transplantatsiya yo‘nalishlarida shifoxonalar ochilishi ko‘zda tutilgan.
“Kambag‘allikni qisqartirishda tadbirkorlik subyektlari bilan o‘zaro manfaatli hamkorlik o‘rnatishga qaratilgan chora-tadbirlar to‘g‘risida”gi prezident farmoni asosida respublika Kambag‘allikni qisqartirish va bandlik vazirligi tomonidan “Dr Boboyev Health Center” MCHJga eng ko‘p ish o‘rni yaratish borasidagi tashabbuslari uchun maxsus imtiyozli sertifikat taqdim etilgan. Bu sertifikat asosida MCHJ bino uchun to‘lanadigan mablag‘ni 3 yil davomida bo‘lib to‘lab borish imkoniyatini qo‘lga kiritgan.
Tender uchun ariza bundan bir oy muqaddam berilgan. Alisher Boboyev 2023 yilning 28 oktyabr kuni viloyat sog‘liqni saqlash boshqarmasi boshlig‘i etib tayinlandi. Qayd etilishicha, bu bino sog‘liqni saqlash tizimi tasarrufida emas.
Izoh (0)