Истанбулдаги Бош консулхонага 14 январь куни қўлбола спиртли ичимлик истеъмоли оқибатида заҳарланиб вафот этган 5 нафар Ўзбекистон фуқаросининг яқин қариндошлари мурожаат қилди. Бу ҳақда Бош консулхона матбуот хизмати хабар берди.
Маълум қилинишича, ушбу ҳолатлар Истанбулнинг Аксарай туманида сотиб олинган спиртли ичимлик истеъмоли оқибатида юзага келган.
Вафот этган фуқаролар асосан 35–40 ёшдаги эркаклар бўлган.
Бош консулхона фавқулодда ҳолатлар юзасидан қуйидаги телефон рақамларга мурожаат қилишни сўраган: +905535411717
Аввалроқ Самарқандда ароқдан заҳарланиш оқибатида 5 нафар эркак вафот этгани ҳақида хабар берилганди.
Андижон вилоятида 2024 йил декабрида 5 киши спиртли ичимликдан заҳарланиб вафот этганди. 22 киши Ўзбекистон акциз маркаси ёпиштирилган “Ўзбекистон” номли коняк истеъмол қилгани оқибатида шифохонага ўткир заҳарланиш ташхиси билан ётқизилган. Шифокорлар томонидан кўрсатилган зарур тиббий ёрдамга қарамасдан, уларнинг 5 нафари вафот этганди.
2023 йилнинг сентябрида Фарғона вилояти Қўштепа ва Олтиариқ туманларида 7 киши ароқдан заҳарланганди. Наманганда эса 2020 йил охирларида 12 киши ароқдан заҳарланиб, уларнинг икки нафари вафот этганди.
Изоҳ (0)