Тўғри овқатланиш тартибига онгли ёндашиш нормал вазнни сақлаб қолиш билан бирга кун давомида ўзингизни яхши ҳис этишингиз учун энергия беради. Унга амал қилиш доим ҳам осон бўлавермайди, асосийси, секин-аста бошлаш ва изчил давом эттиришдир.
Соғлом овқатланиш тартибига амал қилишни уйқудан аввал истеъмол қилиш тавсия этилмайдиган маҳсулотларни емасликдан бошлаш мумкин. Бунинг учун биз мутахассис диетологлар маслаҳатига қулоқ тутамиз.
Нима учун кечки овқатни назорат қилиш керак?
Тунги уйқу нафақат тананинг жисмонан дам олиши учун, балки ички органларнинг ўз кучини тиклаб олиши учун ҳам муҳим. Уйқудан аввал тамадди қилиш натижасида танадаги энергиянинг катта қисми ички органлар тикланишига эмас, овқат ҳазм қилишга сарфланади. Бу эса умумий саломатликда акс этади.
Демак, уйқудан аввал нималар ейиш тақиқланади?
Нон маҳсулотлари
Нон маҳсулотларидаги юқори даражадаги гликемик индекс ҳамда крахмал инсонга қисқа муддатга тўйинганлик ҳиссини беради ва кўп ўтмай яна очлик ҳисси пайдо бўлади. Тунда нон маҳсулотлари ва ширинликлар билан тамадди қилиш қондаги шакар миқдорини оширади, у ўз навбатида кортизол ишлаб чиқарилишига имкон беради. Айнан шу гормон биз кечаси кўп уйғонишимиз сабабчисидир.
Шунинг учун, тунда ширинликлар, хамир овқатлар, макарон, картошка ва барча крахмалли сабзавотлар, қуритилган меваларни чеклаш лозим. Уларнинг бари қорин соҳасида ёғ тўплайди.
Кефир
Кўпчилик тунда кефир ичиб ётиш соғлом одат деб ҳисоблайди. Аслида эса тунда истеъмол қилинган бир стакан кефир умумий саломатликни яхшилаш нуқтайи назаридан нотўғридир.
Сабаби юқорида келтирилган маҳсулотлар каби — гликемик индекс туфайлидир. Ётишдан аввал мунтазам равишда кефир ичиш углевод алмашинувининг бузилишига олиб келиши мумкин.
Ёғли соуслар
Ушбу турдаги маҳсулотлар юқори калорияси ва ҳазм қилиш қийинлиги билан ажралиб туради. Соуслар таркиби туз, шакар, таъмни кучайтирувчилар, глютен, ширин таъм берувчилар, қуюқлаштирувчи моддалар ҳамда ранг берувчи турли моддаларни ўз ичига олади. Буларнинг барчаси ошқозон учун оғир юк ва стресс бўлиб, уйқудан аввал истеъмол қилиш зарарлидир.
Дудланган гўшт ва колбаса маҳсулотлари
Ушбу турдаги озиқ-овқатларнинг ҳеч қандай фойдали жиҳати йўқлиги барчамизга маълум. Шунинг учун тунги тамаддига колбаса маҳсулотларини қўшиш мутлақо хатодир.
Спиртли ичимликлар
Алкогольнинг зарарли жиҳатлари ҳақида барча ёшдаги инсонлар хабардор, лекин шундай бўлса ҳам, эслатиб ўтишни жоиз топдик. Тунда ичилган спиртли ичимлик уйқунинг энг чуқур фазаси — тўртинчи босқичини тормозлайди. Ушбу босқич хотира, идрок ва ижодкорлик учун жавоб беради, мия етарли дам олиши ҳамда тикланишни таъминлайди.
Изоҳ (0)