Аввалроқ Самарқандда ароқдан заҳарланиш оқибатида 5 нафар эркак вафот этгани ҳақида хабар берилганди. Бош прокуратура матбуот хизматининг хабар беришича, қўлбола усулда тайёрланган спиртли ичимлик маҳсулотларини сотган шахсга нисбатан жиноят иши қўзғатилди.
Маълум қилинишича гумонланувчига нисбатан Жиноят кодексининг 186-моддаси ( хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) 4-қисми "а" банди билан жиноят иши қўзғатилган.
Ҳозирда тергов ҳаракатлари олиб борилмоқда.
Вафот этган шахслар шаҳарнинг турли маҳаллаларида яшовчи 63, 50, 72, 39 ва 56 ёшдаги эркаклар бўлиб, тўрт нафари ўз яшаш хонадонида, яна бири шифохонада 11 январь куни вафот этган. Аксарияти спиртли ичимликка ружу қуйган шахслар бўлган.
Марҳумларнинг ўлими сабабларини аниқлаш мақсадида суд-тиббиёт ҳамда кимёвий экспертизалар тайинланган.
Андижон вилоятида 2024 йил декабрида 5 киши спиртли ичимликдан заҳарланиб вафот этганди. 22 киши Ўзбекистон акциз маркаси ёпиштирилган “Ўзбекистон” номли коняк истеъмол қилгани оқибатида шифохонага ўткир заҳарланиш ташхиси билан ётқизилган. Шифокорлар томонидан кўрсатилган зарур тиббий ёрдамга қарамасдан, уларнинг 5 нафари вафот этганди.
2023 йилнинг сентябрида Фарғона вилояти Қўштепа ва Олтиариқ туманларида 7 киши ароқдан заҳарланганди. Наманганда эса 2020 йил охирларида 12 киши ароқдан заҳарланиб, уларнинг икки нафари вафот этганди.
Изоҳ (0)