Абдулла Қурбонов нафақат ижоди, балки санъатдан ташқари ҳаёти билан ҳам тез-тез тилга тушадиган хонанда ҳисобланади. Шу билан бирга унинг ҳаёти машаққатларга ва зиддиятли вазиятларга жуда бой.
“Муҳриддин Ҳолиқовнинг шарт қўйган”
Хонанда 1976 йилнинг 2 сентябрь куни Акбар Қурбонов хонадонида дунёга келган. Серфарзанд оилада 9 та ўғил ва қиз фарзанд вояга етган. Улар орасида Абдулла Қурбонов ҳам бор эди. Гарчи оиласида санъаткорлар бўлмаган бўлса ҳам у болалигидан санъатга меҳр қўйган. У илк марта 1987 йили акаси Дониёр Қурбоновнинг тўйида қўлига микрофон олиб қўшиқ куйлаган. Уни зимдан кузатиб турган хонанда Муҳриддин Ҳолиқовга уни шогирдликка олишини сўрашади. “Бир шартим бор, агар “Араб тангоси”ни ижро этишни уддаласа, уни шогирдликка оламан”, деган жавобни олгач, хонанда қўшиқни қунт билан ўрганади. Муҳриддин Ҳолиқов уни шогирдликка олиб, тўй-хизматларига ўзи билан олиб боради.
— 1990 йили “Халқлар дўстлиги” санъат саройида ёш эстрада қўшиқчиларининг кўрик танлови ўтказилган. Иштироким кўпчиликка маъқул бўлган Муҳриддин Ҳолиқовнинг дуоларини олиб, Фарруҳ Зокировга қўнғироқ қилганман. “Мени шогирдликка олинг”, деганман. У пайтларда Фарруҳ Зокиров ва “Ялла” гуруҳининг номи бутун дунёга танилган, машҳурлик борасида унча-мунча хонанда уларга тенг кела олмасди. Муҳриддин Ҳолиқовнинг маслаҳатига кириб, “Араб тангоси”ни ўрганганим қўл келган ва 1991 йили Фарруҳ Зокиров жамоасига шогирдликка қабул қилинганман. Беш йил давомида қўшиқчилик сирларини ўрганиб, “Ялла”нинг кўплаб концертларида иштирок этганман, дейди Абдулла Қурбонов.
“Бойиб кетсам онамни ишлатмайман”
Абдулла Қурбонов қийинчиликларда ўтган болалик йилларини қуйидагича эслайди.
— Катта рўзғорни тебратиш осон бўлмаган. Кейинчалик отам новвойчиликни ташлаб, таксопаркка ишга кирган. “Сариқ сигирни соғиб, сизларни боққанман”, деса сигиримиз йўқ-ку, деб ҳайрон бўлардим. Кейинчалик билсам, дадам сариқ сигир деганда, такси машинасини назарда тутган экан. Онам эса рўзғор ишларидан ортиб, новвойчилик ҳам қиларди. Мен уларни бозорга олиб чиқиб сотардим. 50 та нон ёпиш учун оташ-олов бўлиб ёнаётган тандирга шунча марта кириб чиқишига тўғри келарди. “Бойиб кетсам онамни ишлатмайман”, деб ният қилардим. Шукрки, уларнинг бари амалга ошди, дейди хонанда.
“Машинам думалаб кетди”
2002 йили хонанда автофалокатга учрайди ва жиддий жароҳат олади. Хонанда бу ҳолатни суиқасд дея баҳолайди.
— Эрта тонгда оилам учун Кўкча бозоридан нон, қаймоқ олиб, бир дўстим совға қилган Nexia машинасида укам билан уйга қайтаётганимизда кўп қаватли уйлар орасидан чиққан “Москвич” йўлимда туриб олди. Тўқнашувдан сақланиб, рулни бурганимда машинам думалаб кетди. “Москвич”да ўтирган тўрт йигитнинг ҳеч бири ёрдам бермай, кўздан ғойиб бўлишган. Уюштирилган бўлмаганида уларга зарар етказмаслик мақсадида жонимизни хавфга қўйганим учун раҳмат эвазига ёрдам бериши керак эмасмиди?!, дейди хонанда.
“Тан оламан, авваллари чекканман”
Хонанда гиёҳванд модда сабаб озодликдан маҳрум этилган. Санъаткорнинг сўзларига кўра, яқин танишларидан бири уни тўйга чақириш баҳонасида уйига меҳмонга келганида, қўшиқчининг рад этишига қарамай, унга гиёҳванд моддани “ҳадя тариқасида” берган.
Абдулла Қурбонов авваллари “бу нарса”ни тўйларда, улфатлар билан ўтиришларда қабул қилганини тан олди, лекин ўша пайтда ташлаганини, соғлиғи ҳам кўтармаслигини таъкидлаб ўтди.
— Орадан 5-10 дақиқа ўтгач, ходимлар кириб келди… Тан олишим керак, олдинлари чеккан бўлсам, чекканман. Лекин мен уларга буни олиб келинглар демаганман, буни залда ҳам (суд залида) айтганман. Аммо қонун ҳамма учун бир хил экан. Гиёҳванд модда сабаб қамалганман, дейди Абдулла Қурбонов.
“Қамоқхонага Юлдуз Усмонова келган”
Хонанда Қашқадарёдаги жазони ижро этиш муассасида муддатини ўтаётганида фақатгина Юлдуз Усмонова уни кўргани боргани ва унинг гаплари катта куч бағишлагани ҳақида сўзлаб берган.
— Шунча санъаткорларнинг ичида Юлдуз Усмонованинг мард тарафларидан биттаси — қамоқда эканимда Қашқадарёдаги қамоқхонага мени кўргани борган эканлар.
Қамоқхонага бориб, раҳбарларни чақириб, “шу бола менинг боламдай, менинг укам, мен энг яхши кўрган санъаткорлардан биттаси бу, унга эътиборни жиддийроқ қилинглар, бу ҳали халққа керак. Ҳар хил гап-сўзлар эшитяпмиз, ишқилиб болага тазйиқлар йўқми, ҳеч қанақа зулмлар йўқми?”, деб мендан хабар олишга борган.
Майли, одамнинг нарсаси эмас, одамни эътибори муҳим, қанча санъаткорлар бўлган ўша пайт, қўрққан ҳаммаси, худди менга яқинлашса, уларни ҳам қамаб қўядигандек туюлган уларга. Тўғрисида, қўрққан. Одамлардан эмас, Худодан қўрқишсин! Ўша пайт Юлдуз опа ҳеч нимадан қайтмасдан Қашқадарёга жамоа билан борган эканлар. Менинг қайси қамоқхонада эканлигимни суриштиришган.
Мени раҳбарият чақириб, “Юлдуз Усмонова сенга ким бўлади?”, деб савол беришганда мен хавотирда бўлдим. Нима бало, опамгаям бир нарсалар бўлганмикан, деган фикрда бўлиб турганимда, “ўйлама, қўрқма, хавотир олма. У одамга ҳеч қанақа ёмонлик қилмаймиз, тўғри маънода сўраяпмиз, ким бўлади?”, деганида, мен “опам бўладилар, ҳурмат қиламан, нима гап?” десам, шу ерга келдилар, лекин қонун доирасида учраштириш мумкин эмас, нимагаки, фамилия тўғри келмайди, “фақатгина оилангга рухсат, бошқаларга мумкин эмас деган қонун бор”, дейишганда улар ҳам, опа ҳам тўғри тушунганлар.
“Майли, фақат менинг шахсий илтимосим, менинг келганимни чақириб, менинг номимдан икки оғиз ҳол-аҳволини сўраб қўйинглар”, деганлари катта эътибор. Кўряпсизми эътиборни, мисол, менга жонлари ачиб, нима учун борганлар, қайсидир жиҳатим опага хуш келган, қайсидир характеримни яхши кўрган. Аёл киши боши билан, унча-мунча эркак киши қилмаган меҳрни берган шу одам. Шунинг учун ҳам опани яхши кўраман, дейди Абдулла Қурбонов.
“Қамоқхонадаги уч йил…”
Хонанда кўплаб суҳбатларида автофалокатга учраган ёки қамалган пайтида ҳам аёли ва онасининг далдаси катта куч бағишлариги ҳақида айтиб ўтган.
— Жазони ўташ муассасасида ўтган уч йил давомида ўзимдан ўтгани фақат ўзимга аён. Бундай пайтда онамнинг дуоси ва рафиқамнинг қўллаб-қувватлаши менга куч бағишлади, — деди хонанда.
“Бир ўлимдан қолганман”
Хонанда интервьюларининг бирида бир ўлимдан қолгани ҳақида ҳам сўзлаб берган.
— “Отимнинг ўлишини билганимда, бир қоп кепакка алмашган бўлардим” , дейишган. Бошимга тушган синов ҳақида ҳам “Беайб Парвардигор, ҳар бандада бир айб бор. Менинг айбим тўқлигимдир, тўқлигимдан шўхлигимдир” мисрали қўшиқ ҳозирлаяпман. Бир ёмоннинг яхшиси бор. 2013 йил чет элда яшайдиган дўстим Жалолиддин билан қўнғироқлашдим, октябрда икковимиз оиламиз билан бир ой кемада сайр қилишга келишдик. Рафиқам, тўрт фарзандимни олиб, Флоридадаги Диснейлендга олиб боришни ҳам режа қилиб, бир йилга виза олдик. Лекин 27 август тарих зарварақларида эмас, юрагимда ўчмас доғ бўлиб қолди. Ўша санада менга нисбатан жиноий иш очилиб, чет элга боролмаганмиз... Радиода эса биз сайр қилишни режа қилган кема ҳалокатга учраганини эшитдим, оилам билан бир ўлимдан қолганманда, деди хонанда.
Муҳокамалар марказидаги хонанда
2002 йил 16 февралда қўшиқчининг ички ишлар бошқармасида безорилик қилаётгани ҳақидаги видео тарқалди. Қурбоновнинг сўзларига кўра у Бўстонлиқдаги тўйдан кейин кафега бориб, спиртли ичимлик истеъмол қилган ва жанжалда қатнашган ҳамда 10 суткалик жазога тортилган.
Бундан ташқари, хонанда “Миллион” жамоаси, Улуғбек Ҳолмедов, Жамшид Абдуазимов ва Жаҳонгир Отажоновлар билан ҳам жиддий сан-манга борган. Ички ишлар ходимларини ҳақоратлагани ҳам кўплаб муҳокамаларга сабаб бўлган.
Оиласи ҳақида…
Хонанда оиласи ҳақида гапиришни унчалик истамайди, ҳозирча фақатгина тўнғич ўғли Музаффар Қурбонов отасининг касбини давом эттириб, санъатда фаолият юритмоқда. Аммо ҳозирча ижодида ўзига хослик сезилгани йўқ.
Изоҳ (0)