“Надомат” лойиҳасининг навбатдаги қаҳрамони Тошкент вилояти Зангиота туманида туғилган. У айни кунда жазо муддатини Оҳангарон шаҳридаги 44-сон манзил колониясида ўтамоқда. У суҳбат давомида жиноятидан пушаймон эканлигини айтиб ўтди.
Маҳкум — 33 ёшда. У Жиноят кодексининг 97-моддаси 2-қисми билан айбдор деб топилиб, 18 йилга озодликдан маҳрум этилган. У таниш аёл билан тил бириктириб, унинг турмуш ўртоғини қасддан ўлдирган.
— Аёл кишининг макрига учиб энг оғир гуноҳни содир этдим. Яъни унинг гапи билан турмуш ўртоғининг қотилига айландим.
2015 йили у аёл билан интернет орқали танишиб қолганман. У турмуш ўртоғининг уч йил аввал Қозоғистонга кетгани ва анчадан бери у ва тўрт боласидан хабар олмаётгани ҳақида айтганди. “На телефон қилади, умуман хабар олмайди, ҳатто унинг ўлик ёки тириклигини ҳам билмайман”, деганди. Аёл тўй қилиб қарзга кириб қолганини айтиб, мендан ёрдам сўради. Майли, қўлимдан келганча ёрдам бераман, дегандим. Ўша вақтда далага экин-текин экардим, у ёнимда юриб, кирларимни ювиб, ош-овқатимни қилиб берарди. Шу тарзда кунлар ўтди ва орадан бир йил ўтиб, фарзандлари билан танишиш учун уйига бордим. Ўшанда унинг турмуш ўртоғи борлигини билдим. “Нега мени алдадинг?” десам, “Далага борганда сизга ҳаммасини тушунтираман”, деди. “У инсон хўжакўрсинга турмуш ўртоғим, у билан алоқалар узилган”, деди. Унга 10 сотих даладаги қулупнайни пишириб бериш, уларни сотиб қарзларидан қутулишини айтдим. Фақат ортиқ кўзимга кўринма, деб таъйинладим.
Орадан бир неча кун ўтганидан кейин ярим кечаси уйга қайтаётганимда қўл телефоним жиринглади. “Мен Ҳусан акангизман, бўшаб қўнғироқ қилинг, зарур гапим бор”, деди. Билсам у таниш аёлнинг турмуш ўртоғи экан. “Қабрларни келиб суваб бероласизми?” деди. Йўқ деёлмай, эртаси куни Тўйтепага бордим ва у эркак билан учрашдим. Орада аёлнинг ота уйида ҳам қурилиш қилдим. Бир йилга яқин уйларига қатнаб, эски уйни бузиб, уй солдим.
Шу орада аёл ҳар доим “эримни ўлдириб юбориш керак”, деб кўп гапирарди. Бу таклиф берилганида уч ой бу ишни қилолмай юрдим. Уйида ишлаётганимда у менга кўп газланган ичимлик олиб келарди. Шунга у бу нарса қўшганми, деб шубҳа қиламан.
Бир куни ишдан кейин эри билан ўтириб спиртли ичимлик ичдик. Кейин бир пайт эркак ўрнидан туриб, ўтин кесадиган моторли аррасини ёқиб елкамнинг ёнига олиб келди. “Ҳусан ака, ундай қилманг, оқибати яхши бўлмайди”, дедим. Бир оздан сўнг у қўлидагини тушириб, кетди. Унинг қилган ишини аёли билан қизи кўриб ўтирганди. Эркак хонасига кириб кетганидан кейин аёли ёнимга келиб “Агар буни ўлдирмасангиз, сизни ўлдиради”, деб гапираверди. Спиртли ичимлик таъсирида бўлганим учунми, бу гапларни оғир қабул қилдим. Орадан анча вақт ўтганидан кейин уни ишига чақиришди. У Нурафшондаги “Сувсоз”да ишларди. Ишга кетиши билан аёл яна бир литр ароқ олиб келди. Ҳаммасини менга ичирди, мойиллигим бўлгани учун рад этмадим. Кетидан газланган ичимлик берди ва пиёланинг тагида оқ нарса борлигини кўрдим. У-бу нарса тушиб қолгандир, деб ўйладим. Эркак уйига қайтганидан кейин арра билан таҳдид қилгани эсимга тушиб, орқа миясига кувалда билан уриб, ўлимига сабаб бўлдим. Агар сарҳуш бўлмаганимда, ҳеч қачон бундай қилмаган бўлардим.
Қонга беланган эркакни кўриб, сарҳушлигим ҳам тарқади. Нима қилиб қўйганимни эслаб, афсусландим, аммо энди кеч эди. Тўққиз ой на еганимни, на ичганимни билдим.
Мен ҳали оила қурмагандим, аёл мендан 16 ёш катта эди. У билан нега танишганимни эсласам, қилган ишларимдан уялиб кетаман. Қотилликка аёлнинг 1997 йилда туғилган қизи ҳам гувоҳ бўлганди. “Қиз бола қамалмасин деб, унга ўлдириш билан таҳдид қилганимни”, айтиб гувоҳлик бердим. Аёл эса 13 йилга озодликдан маҳрум этилди.
Нега бундай қилдим, деб кўп ўйлайман. 18 йилга озодликдан маҳрум бўлиш жуда оғир, уни ҳеч бир сўз билан таърифлаб беролмайман. Ҳаммасига ичкилик сабаб, ҳар қандай сарҳуш қиладиган нарса борки, эркак кишини синдиради. У инсонни жиноят кўчасига олиб киради. Қилган ишимдан пушаймонман, аммо энди афсусларимдан ҳеч қандай фойда йўқ, дейди маҳкум.
Видеони тўлиқ ҳолда қуйида томоша қилишингиз мумкин.
Изоҳ (0)