Namangan viloyatida 2020-yil oxirlarida 12 nafar fuqaro o‘tkir zaharlanish tashxisi bilan shifoxonaga yotqizilgan, ularning ikki nafari vafot etgan. Bu haqda Bosh prokuratura matbuot kotibi Hayot Shamsutdinov xabar berdi.
Ma’lum qilinishicha, To‘raqo‘rg‘on tumanida 12 kishi 29—31-dekabr kunlari Qirg‘iziston aksiz markasi yopishtirilgan “Gradusnik” nomli spirtli ichimlik iste’mol qilganliklari oqibatida shifoxonaga o‘tkir zaharlanish tashxisi bilan yotqizilgan.
Shifokorlar tomonidan ko‘rsatilgan zarur tibbiy yordamga qaramasdan, ularning 2 nafari vafot etgan.
Mazkur holat yuzasidan To‘raqo‘rg‘on tumani prokuraturasi tomonidan Jinoyat kodeksining tegishli moddasi bilan jinoyat ishi qo‘zg‘atilgan. Hozirda tergov harakatlari olib borilmoqda.
Eslatib o‘tamiz, 2018-yilning oktabrida Chustda 30 kishi kabobdan zaharlanib, shifoxonaga yotqizilgan edi. 2019-yilning sentabrida esa Chustdagi to‘yda ommaviy zaharlanish ro‘y bergandi. O‘shanda yigirmaga yaqin odam shifoxonaga murojaat qilgan.
Izoh (0)