Россияда ишлаб чиқарилган машҳур анимацион мультсериал “Қизалоқ ва Маймоқ” кўплаб мамлакат болалари орасида оммалашган. Мультфильм қизиқувчан, шўх ва гиперфаол қизалоқ Маша ҳамда унга сабр билан ғамхўрлик қилувчи Айиқ ҳақида ҳикоя қилади. Лойиҳа ҳақиқий феноменга айланган: уни Европадан тортиб Осиё, Лотин Америкаси ва Яқин Шарққача бўлган турли мамлакатларда севиб томоша қилишади.
YouTubeъда мультфильмнинг ҳар бир серияси юз миллионлаб марта кўрилган. Маша сурати туширилган ўйинчоқлар эса Disney қаҳрамонлари билан бир қаторда бутун дунё бўйлаб болалар дўконларида сотилмоқда. Хўш, қандай қилиб Disney, Pixar каби халқаро йирик студияларга алоқаси бўлмаган оддий рус мультфильми глобал брендга айланди?
Юқори даражадаги сифат
Мультфильмнинг асосий ютуғи — унинг сифати. Кинотанқидчилар фикрича, халқаро аудиторияни забт этиш учун сифатли анимация катта аҳамиятга эга.
“Бу болаларча шўхлик ҳақидаги мультфильм эмас, балки техник жиҳатдан жуда пухта ишланган анимация. Айнан шунинг учун Маша ҳақидаги ҳикоялар томошабинларга ёқди. Унда фақат олд фон ҳаракатда бўлиб, орқа фон қотиб қолган ҳолатда турмайди, мультфильмда барча нарсалар жонли, ҳаракатда бўлади”, дейди экспертлар.
Дастлабки эпизодларданоқ визуал кўриниш ва сценарий устида катта меҳнат қилингани билинади. Шу сабабли ҳам сериал халқаро анимация саноатининг эътиборини тортди.
Йирик студиялар даражасидаги мустақил лойиҳа
Кўп ҳолларда хорижий муаллифлар йирик студиялар ёрдамисиз халқаро бозорга чиқа олмайди. Аммо “Қизалоқ ва маймоқ” бу борада истисно бўлди. Бу ижодкорларнинг тажрибаси, маҳорати ва ишлаб чиқариш жараёнига катта эътибор берилгани натижасидир.
“Лойиҳага жуда катта маблағ тикилгани яққол сезилади. Натижада юқори сифатли маҳсулот яратилган”, дейди кинотанқидчи Александр Голубчиков.
Чунки бу сериал YouTube ёки телевидение учун тайёрланган арзон маҳсулот эмас. Лойиҳа муаллифлари учун сифат даражаси устувор вазифа саналган.
Пухта ишлаб чиқилган маркетинг стратегияси
Ҳар қандай мультфильм қанчалик қизиқарли бўлмасин, агар уни ҳеч ким кўрмаса, муваффақият ҳам қозонмайди. Агар Animaccord компанияси мультфильмни халқаро аудиторияга тарғиб қилмаганида, маркетингга сармоя киритмаганида ҳамда кино ярмаркаларида иштирок этмаганида эди, митти қизалоқ ҳақидаги мультфильм халқаро томошабинга етиб бормаган бўларди.
Мазкур лойиҳа ижодий ғоя ва тўғри режалаштирилган бизнес стратегиясининг уйғунлиги қандай қилиб глобал муваффақиятга олиб чиқишини исботлади.
Барча халқлар учун тушунарли ҳикоялар
“Қизалоқ ва маймоқ” нинг яна бир ютуғи уни таржимасиз ҳам тушуниш мумкинлигидир. Ҳар хил миллат вакиллари бу мультфильмни осонгина қабул қилади.
Мультфильм фақат болалар учун эмас
Совет анимацияси каби “Қизалоқ ва маймоқ” ҳам турли ёшдаги томошабинларга мўлжалланган. Бу эса мультфильмга яна бир карра устунлик беради. У болаларга ҳам, катталарга ҳам бирдек қизиқ бўла олади.
Изоҳ (0)