АҚШ президенти Дональд Трамп Гренландияни аннексия қилишда ҳарбий куч ишлатиш билан яна таҳдид қилди. Президент буни NBC News’га берган интервьюсида маълум қилди.
Ресурсларга бой орол устидан назоратни қўлга киритиш АҚШга миллий хавфсизлик мақсадларида зарурлиги таъкидланди.
Мен буни қиламан деб аниқ айтмаяпман, лекин ҳеч нарсани истисно қилмайман. Бизга Гренландия жуда зарур. У ердаги жуда оз сонли инсонларга ўзимиз ғамхўрлик қиламиз. Бу ҳудуд бизга халқаро хавфсизлик учун муҳим, деди Трамп NBC News’нинг якшанба куни эфирга узатилган интервьюсида.
Трамп Гренландияни савдо, куч ёки иқтисодий мажбурлаш йўли орқали қўлга киритишини бир неча бор билдирган. Аммо НАТО иттифоқчиси Дания ва Гренландия бу ғояни қатъиян рад этган.
Экспертлар фикрича, оролда қизиқиш уйғотувчи бир нечта омиллар мавжуд: Гренландия АҚШ ва Европа ўртасида жойлашган ўзига хос геосиёсий позицияни эгаллайди. Бу Россия томонидан эҳтимолий ҳужумни қайтаришга ёрдам беради. У, шунингдек, асосий юк ташиш йўли бўйлаб жойлашган ва стратегик денгиз минтақаси бўлган Гренландия-Исландия-Буюк Британия бўшлиғининг бир қисми ҳисобланади.
Аммо экспертлар Трамп Гренландиянинг бошқа жиҳатларини, масалан, табиий ресурслар захирасини кўзлаётганини тахмин қилмоқда. Ушбу ресурслар қаторида нефть ва газ, электромобиллар, шамол двигателлари ва ҳарбий техникалар учун муҳим бўлган нодир металлар бор.
АҚШ, Россия ва Хитой ҳукуматлари Гренландия ҳудудида ҳукмронлик учун даъвогарлар қаторида туради.
Трамп Гренландияни АҚШга қўшиб олишини айтди. Аниқ қилиб айтаман: Қўшма Штатлар бундай қила олмайди. Гренландия фақат бизга тегишли. Келажагимизни биз ўзимиз ҳал қиламиз, деб ойдинлик киритган эди орол бош вазири Йенс-Фредерик Нилсен март ойида.
Гренландия Трамп истаётган ягона ҳудуд эмас. У бир неча бор Канадани аннексия қилиш ва уни АҚШнинг “51-штатиъга айлантириш ҳақида сўз юритган. Бу эса икки азалий иттифоқчи ўртасидаги муносабатларга путур етказган.
Изоҳ (0)