Google корпорацияси “Google. Хариталар” хизматида америкалик фойдаланувчилар учун Мексика кўрфазини Америка кўрфази деб қайта номлайди. Бу ҳақда CNN компания баёнотига асосланиб хабар берди.
Ўзгариш Географик номлар ахборот тизими (GNIS) — АҚШ ва унинг назоратидаги ҳудудларда жойлашган объектлар ҳақидаги маълумотлар базаси янгилангандан сўнг амалга оширилади.
Google расмий ҳукумат манбаларида янгиланган номларни ўзгартириш бўйича ўзининг узоқ йиллик амалиётига риоя қилишини маълум қилди.
Жорий йилнинг 25 январь куни АҚШ президенти Дональд Трамп Мексика кўрфазини Америка кўрфази, Аляскадаги Денали чўққисини эса Мак-Кинли деб номлашни буюрди.
Бу ўзгаришлар мамлакатнинг АҚШнинг ноёб меросини асраш ва келажак авлод америкаликларга қаҳрамонларнинг хотирасини эъзозлаш ҳамда тарихий қадриятларни улуғлаш имкониятини яратиш йўлидаги саъй-ҳаракатларини тасдиқлайди, дейилади АҚШ Ички ишлар вазирлиги хабарида.
Google Аляскадаги Денали чўққисини ҳам ўз хариталарида қайта номлайди.
Компаниянинг таъкидлашича, “расмий номлар турли мамлакатларда фарқ қилади, “Google. Хариталар” фойдаланувчилари расмий маҳаллий номни кўришади”.
Трампнинг таҳдидлари
2024 йил декабрь ойининг охирида Дональд Трамп бир неча баёнотларида АҚШнинг Панама канали ва Гренландия устидан назоратни ўрнатиши “Америка миллий хавфсизлиги” масаласи эканини таъкидлаган. 7 январда ўтказилган матбуот анжуманида у Панама канали ва Гренландияни қўлга киритиш учун ҳарбий ёки иқтисодий босим ўтказиш эҳтимолини рад этмаган. Шунингдек, Трамп Канадага АҚШ таркибига қўшилишни таклиф қилган.
Дания ҳукумати декабрь ойида Гренландия мудофаасига ажратиладиган маблағни камида 1,5 миллиард долларга оширишини эълон қилди. Бундан ташқари, қироллик ўзининг расмий гербини ўзгартириб, унда Гренландия ва Фарер ороллари рамзларини катталаштирди.
Изоҳ (0)