АҚШ Вакиллар палатасидаги республикачилар гуруҳи сайланган президент Дональд Трампга Гренландияни сотиб олиш учун юридик ваколатлар бериши керак бўлган қонун лойиҳасини тайёрлади. Бу ҳақда Fox News хабар берди.
Хусусан, Теннесси штатидан республикачи Энди Оглс 10 нафар партияси аъзолари билан биргаликда “Гренландияни яна буюк қилинг акти” (Make Greenland Great Again Act) номли қонун лойиҳасини таклиф қилди.
Унга кўра, АҚШнинг амалдаги президенти инаугурациядан сўнг дарҳол Дания билан Гренландияни сотиб олиш бўйича музокараларни бошлаши, келишув тузилгандан сўнг бу ҳақда Конгрессга (бюджет маблағларини тақсимловчи сифатида) хабар бериши мумкин.
“Америка иқтисодий ва хавфсизлик манфаатлари энди эътибордан четда қолмайди, Вакиллар палатасидаги республикачилар Трампга Америка халқи манфаатлари йўлида муваффақият қозонишида ёрдам беришга тайёр”, деди Оглс.
Ўз навбатида, Трамп администрацияга сайланган АҚШ вице-президенти Жей Ди Венс ҳукуматнинг Гренландияда ҳарбий куч ишлатишга эҳтиёжи йўқлиги, бироқ оролга нисбатан “келишув тузиш мумкинлигини” таъкидлади.
Трамп Гренландияни ўзлаштирмоқчи
АҚШнинг сайланган президенти бир неча бор Гренландия АҚШ таркибига кириши кераклигини айтганди. Ун орол миллий хавфсизлик ва ҳимоя учун, жумладан, Хитой ва Россиядан ҳимояланишда стратегик аҳамиятга эгалигини айтган. Гренландия бош вазири Муке Эгеде бунга жавобан орол “ҳеч қачон сотилмайди” деб жавоб берган. Шу билан бирга, у орол Даниядан мустақилликка эришмоқчи эканини тан олган. У Трамп билан айрим масалаларни муҳокама қилишга тайёр.
Bloomberg манбаларига кўра, Трамп жамоаси Гренландия билан қизиқишган, чунки оролда электрон қурилмаларда ишлатиладиган олтин, олмос, уран ва нодир металларнинг катта захиралари мавжуд. АҚШнинг Гренландия минерал-хом ашё секторига киритган сармояси дунёнинг нодир металлар бозорида Хитойнинг ҳукмронлигига қарши курашда ҳал қилувчи рол ўйнаши мумкин.
Трампнинг таҳдидлари туфайли Дания Гренландия мудофаасини кучайтириб, гербини ўзгартирган. Қирол Фредерик Х Норвегия ва Швеция билан иттифоққа ишора қилган ва 500 йилдан ортиқ вақт давомида гербда бўлган учта тожни олиб ташлашни буюрган. Гренландия ва Фарер ороллари рамзлари — оқ айиқ ва қўчқор икки қисмга бўлиниб, иккинчи ва учинчи майдонларга кўчирилган, яъни катталаштирилган. Дания ва Жанубий Ютландия рамзлари эса биринчи ва тўртинчи майдонларга ўтказилди.
Изоҳ (0)