Трамп АҚШдаги сайловларнинг боришидан норози бўлиб, намойишлар ўтказишга чақирди

АҚШ Конгрессига оралиқ сайловлар чоғида ёппасига носозликлар юз бермоқда, норозилик намойишларига чиқиш керак, дея даъват этди Америка собиқ президенти Дональд Трамп Truth Social ижтимоий тармоғида.

«Детройтда бюллетенлар йўқлиги билан боғлиқ вазият жуда ёмон. Одамлар сайловга келяпти, улар эса ‘кечирасиз, сиз аллақачон овоз бериб бўлгансиз’, деб қайтариб юбориляпти. Бундай ҳолатлар бошқа жойларда ҳам жуда кўп бўляпти. Норозиликка чиқинг, норозиликка чиқинг, норозиликка чиқинг», — деб ёзди Трамп.

Кузатувчиларнинг сўзларига кўра, деб ёзади The Washington Post, гап сайловлар вақтида юз берадиган стандарт вазият, яъни овозларни ҳисоблаш машиналари ишдан чиқиши ҳақида бормоқда. Детройтда Уэйн сайлов округи сайловчилар овозларини ҳисоблаш билан муаммолар юзага келган ва сайлов комиссиялари ходимлари қоғоз кўринишидаги ҳисобга олиш журналига ўтишга мажбур бўлган, бу эса ушланиб қолишларга сабаб бўлган. Бироқ Мичиган штати маъмурлари маълум қилишича, муаммо тушга келиб ҳал бўлган.

«Бу ёлғон. Илтимос, штатимизда сиёсий зўравонликни аланга олдирмаслик ёки рағбатлантирмаслик учун ёлғон гапларни тарқатманг. Умуман, бу ҳеч қаерда керак эмас», — дея Трампнинг баёнотига фикр билдирди Мичиган штати давлат котиби Жоселин Бенсон.

Конгрессга сайловлар 8 ноябрь куни бўлиб ўтди, сўнгги икки йил давомида Демократлар партияси вакиллар палатасида ҳам, сенатда ҳам (вице-президент Камала Харриснинг овози ҳисобига) кўпчилик ўринга эга бўлиб келган, бу эса унга нафақат ўз вакилларини конгресснинг асосий қўмиталарида юқори мансабларга тайинлаш, балки президент Жо Байденнинг ташаббусларини тўсиқларсиз олиб бориш имконини берарди. АҚШда одатда ҳукмрон партия оралиқ сайловлар чоғида ўзидаги ўринларнинг бир қисмидан ажралади.

Ноябрь бошида АҚШ президенти Жо Байден Трамп 2020 йилги президент сайловларидаги мағлубиятини тан олишдан бош тортгани учун демократия хавф остида қолганини айтганди. У конгрессга сайловларда ютқазган тақдирда, ўз мағлубиятини тан олмасликка тайёр бўлган сиёсатчилар туфайли, бундай вазият жорий сайловда ҳам такрорланиши мумкинлигини таъкидлади. «Агар биз вакиллар палатаси ва сенатни қўлдан бой берсак, келаси икки йил даҳшатли бўлади», — деди Байден.