Россиянинг “Рубин” клубида ҳаракат қилаётган ўзбекистонлик марказий ҳимоячи Рустам Ашурматов фаолиятини Эроннинг “Истиқлол” жамоасида давом эттириши мумкин. Varzesh3 нашрининг хабар қилишича, томонлар шартнома имзолаш арафасида турибди.
Теҳрон клуби футболчини марказий ҳимояни мустаҳкамлаш мақсадида жалб қилмоқчи. У Саман Фаллаҳ билан бирга марказнинг асосий жуфтлиги сифатида кўрилмоқда. Манбага кўра, футболчи ва Теҳрон клуби 2 йиллик шартнома борасида келишувга эришган. “Истиқлол” “Рубин” жамоасининг Ашурматов учун сўраётган 500 минг евро миқдоридаги суммани тўлашга тайёр эканлигини билдирган.
Рустам Ашурматов илгари Ўзбекистон ва Жанубий Корея клубларида фаолият юритган. 2023 йил январь ойидан бери Қозон клубида ўйнаб келмоқда.
Агар ушбу трансфер амалга ошса, Ашурматов “Истиқлол” тарихидаги иккинчи ўзбекистонлик легионерга айланиши мумкин. Ҳозирда Ўзбекистон терма жамоасининг яна бир аъзоси Жалолиддин Машарипов ҳам Эрон клуби сафида ўйнаб келмоқда.
Маълумот учун, Ашурматов ўтган мавсум “Рубин” сафида 21 учрашувда майдонга тушган. Унинг Қозон клуби билан шартномаси 2026 йил ёзигача амал қилади. Transfermarkt портали ҳимоячининг қийматини 600 минг еврога баҳолаган.
Изоҳ (0)