Канада 1 июлга қадар Европанинг қайта қуролланиш дастурига қўшилишни режалаштирмоқда. Бу ҳақда мамлакат бош вазири Марк Карни маълум қилди.
Маълум қилинишича, гап “Тайёргарлик-2030” қайта қуролланиш дастури ҳақида кетмоқда. Вазир мудофаа соҳасида Канаданинг АҚШга қарамлигини танқид қилган.
Мудофаа соҳасидаги капитал харажатларга сарфланган ҳар бир долларнинг 75 сенти АҚШга кетмоқда. Бу мантиқан тўғри эмас, деган Марк Карни.
Ҳозирда Канада Европа Иттифоқи билан мудофаа дастурида иштирок этиш бўйича музокаралар олиб бормоқда. “Тайёргарлик-2030” режасига кўра, Европа Иттифоқи давлатлари келгуси беш йил ичида мудофаага 1,25 триллион доллар сарфлаши кўзда тутилган.
Биз катта ютуқларга эришмоқдамиз ва Канада кунигача (1 июлгача) аниқ бир натижани кўришни истардик, деди вазир.
Президент Дональд Трамп АҚШнинг янги штати бўлиш эвазига Канадага “Олтин гумбаз” ракетага қарши мудофаа тизимига бепул қўшилишни таклиф қилмоқда.
“Олтин гумбаз” тизимимизга қўшилишни жуда истайдиган Канадага шундай дедим: агар улар алоҳида, аммо тенг ҳуқуқсиз давлат бўлиб қолса, бу уларга 61 млрд долларга тушади. Бироқ бизнинг севимли 51-штатимизга айланишса, бу уларга 0 долларга тушади, деган Трамп.
Ҳозирда Канада мудофаа учун мамлакат ялпи ички маҳсулотининг 1,37 фоизини сарфламоқда. Бу Европа Иттифоқи давлатлари ўн йилдан кўпроқ вақт олдин келишган 2 фоизлик мақсадли кўрсаткичдан анча кам. Марк Карнининг таъкидлашича, мудофаа харажатларининг ошиши муқаррар, аммо Канадага максимал фойда келтирадиган тарзда амалга оширилади.
Изоҳ (0)