Словенияда Ўзбекистон президентини расмий кутиб олиш маросими бўлди (фото)  

Люблянадаги Конгресс майдонида Словенияга расмий ташриф билан келган Шавкат Мирзиёевни расмий кутиб олиш маросими бўлиб ўтди.

Президент матбуот хизматининг хабар қилишича, давлат раҳбарини Словения президенти Наташа Пирс Мусар кутиб олди. Олий мартабали меҳмон шарафига фахрий қоровул сафланди. Ҳарбий оркестр Ўзбекистон ва Словения давлат мадҳияларини ижро этди.

Икки мамлакат раҳбарлари фахрий қоровул сафи олдидан ўтиб, расмий делегациялар аъзолари билан саломлашди.

Расмий маросимдан сўнг “Звезда” боғида уруш қурбонлари хотирасига ҳурмат ҳамда тинчлик ва инсонпарварлик ғояларига садоқат рамзи сифатида Барча урушлар қурбонлари ёдгорлигига гул қўйилди.

Люблянадаги Конгресс майдонида расмий кутиб олиш маросимидан лавҳалар

Шавкат Мирзиёевнинг Словенияга ташрифи

Шавкат Мирзиёев Словения президенти Наташа Пирс Мусарнинг таклифига биноан расмий ташриф билан 21 май куни рафиқаси билан Люблянага келди. Уларни самолёт олдида бош вазир ўринбосари — ташқи ишлар вазири Таня Фаён ва бошқа расмий шахслар кутиб олди.

Ташриф дастурига мувофиқ, Ўзбекистон етакчиси Словения президенти Наташа Пирс Мусар билан музокаралар ўтказади, мамлакат парламенти ва ҳукумати раҳбарияти билан учрашувлар ўтказади, қўшма бизнес форумида иштирок этади.

Ўзаро манфаатли савдо-иқтисодий шерикликни ривожлантириш, саноат, фармацевтика, электротехника, “яшил” энергетика, қишлоқ хўжалиги соҳаларида кооперация лойиҳаларини амалга ошириш, меҳнат миграцияси бўйича ҳамкорлик ва гуманитар алоқаларни кенгайтириш масалалари кўриб чиқилади.

Ўзбекистон—Словения муносабатлари 

Словения Ўзбекистон мустақиллигини 1991 йил 27 декабрда тан олган бўлиб, икки давлат ўртасида дипломатик муносабатлар 1995 йил 16 январда ўрнатилган. 2024 йил октябрь ойида Ойбек Шахавдинов Ўзбекистоннинг Словениядаги биринчи элчиси этиб тайинланди.

Сўнгги йилларда Ўзбекистон ва Словения ўртасидаги савдо-иқтисодий алоқалар ривожланмоқда. 2024 йилда икки томонлама савдо ҳажми 175 миллион доллардан ошди, бу 2023 йилга нисбатан 25 фоизга ўсишни англатади . 2025 йилнинг биринчи чорагида эса савдо ҳажми 127 миллион долларни ташкил этиб, ўтган йилнинг шу даврига нисбатан 47,8 фоизга ўсди.

Словения Европа Иттифоқи аъзоси сифатида Ўзбекистон учун Европа билан алоқаларни мустаҳкамлашда муҳим шерик ҳисобланади.