Жорий йилнинг 27 май куни Тошкентда “БМТ-аёллар” тузилмасининг Ўзбекистондаги ваколатхонасининг тантанали очилиш маросими бўлиб ўтди.
Маросимда Ўзбекистон Республикаси Олий Мажлиси ва Ҳукумати аъзолари, БМТ агентликлари, халқаро ташкилотлар раҳбарлари, шунингдек, фуқаролик жамияти ва хусусий сектор вакиллари иштирок этди.
Таъкидлаш жоизки, “БМТ-аёллар” тузилмаси офисини Тошкентда очиш бўйича олий даражадаги келишувга БМТ Бош котиби ўринбосари, “БМТ-аёллар” тузилмаси ижрочи директори Сима Бахуснинг Ўзбекистонга 2024 йил май ойида амалга оширган ташрифи мобайнида эришилган эди.
Олий Мажлис Сенати Раиси Танзила Нарбаева “БМТ-аёллар” билан ҳамкорликнинг янги босқичини қўллаб-қувватлашини билдириб, офиснинг очилиши мамлакатнинг гендер тенглик соҳасидаги тараққиётини халқаро миқёсда эътироф этиш рамзи сифатидаги муҳимлигини таъкидлади.
"БМТ–Аёллар тузилмасининг Шарқий Европа ва Марказий Осиё бўйича минтақавий офиси директори ўринбосари Элиза Фернандес Саенс хоним билан мазмунли ва самарали учрашув ўтказдик.
Учрашувда Президентимиз Шавкат Мирзиёев ҳамда БМТ Бош котибининг ўринбосари, УН Women ижрочи директори Сима Сами Баҳуснинг қўллаб-қувватлаши билан бугун ўз фаолиятини бошлаган УН Women ваколатхонаси Ўзбекистонда хотин-қизлар ҳуқуқларини таъминлаш йўналишида олиб борилаётган кенг кўламли ислоҳотларнинг халқаро даражада эътироф этилаётганидан далолат экани алоҳида таъкидланди.
Суҳбат чоғида Элиза хоним глобал миқёсдаги сиёсий ва иқтисодий беқарорлик шароитида Ўзбекистонда хотин-қизларнинг давлат бошқаруви, фан, технологиялар, маданият ва бошқа соҳалардаги фаоллигини таъминлаш борасида эришилаётган ютуқларни юқори баҳолади.
Учрашув якунида ҳар бир аёл ва қизнинг салоҳиятини рўёбга чиқаришга хизмат қиладиган рақамли технологиялар ва таълим дастурларини илгари суриш, шунингдек, ушбу йўналишдаги ҳамкорликни янада мустаҳкамлаш ва янги қўшма ташаббусларни амалга ошириш бўйича келишувга эришилди", деди Танзила Нарбаева.
Офиснинг очилиши Ўзбекистон Иқтисодиёт ва молия вазирлиги билан ҳамкорликда амалга оширилаётган Европа Иттифоқи томонидан молиялаштирилаётган гендерга йўналтирилган бюджетлаштириш лойиҳасининг ишга туширилиши билан бир вақтга тўғри келди. Ушбу лойиҳа янги офис фаолиятининг биринчи кенг кўламли йўналиши бўлади.
Маросимда “БМТ-аёллар” ташкилотининг Европа ва Марказий Осиё мамлакатлари бўйича минтақавий директори ўринбосари Элиза Фернандес Саенс офиснинг мамлакат аёллари ва қизлари учун шериклик, тараққиёт ва умид тимсоли сифатидаги аҳамиятини таъкидлади.
“Тенгликка эришиш йўли ушбу офиснинг очилиши билан тугамайди - у янгидан, кўпроқ мажбурият, янги умид ва тўхтовсиз олдинга интилиш билан бошланади”, - деди Элиза Фернандес Саенс.
БМТнинг Ўзбекистондаги доимий координатори Сабина Махл офиснинг очилиши мамлакатнинг инсон салоҳиятини ривожлантириш ва гендер тенгликка қатъий содиқлигини тасдиқлаши, “БМТ-аёллар” билан ҳамкорлик эса ушбу вазифаларни амалга оширишга хизмат қилишини таъкидлади.
Ўзбекистонда “БМТ-аёллар” тузилмаси офисининг очилиши хотин-қизлар ҳуқуқлари ва гендер тенгликни илгари суришда янги даврни бошлаб беради, бу ташкилотнинг юбилейлари ҳамда бутун дунёда хотин-қизлар ҳуқуқларини ҳимоя қилиш ва кенгайтиришга қаратилган асосий халқаро ҳужжатлар йилида айниқса муҳимдир. Жорий йилда ташкилот ўзининг 15 йиллигини, Пекин декларацияси ва Ҳаракатлар платформасининг 30 йиллиги ҳамда БМТ Хавфсизлик Кенгашининг Хотин-қизлар, тинчлик ва хавфсизлик масалалари бўйича 1325-резолюциясининг 25 йиллигини нишонлайди.
Изоҳ (0)