Германиядаги Гамбург ер суди миллиардер Алишер Усмоновни “Дилбар” суперяхтасининг эгаси деб аташни тақиқлади. Бу ҳақда миллиардернинг матбуот хизмати хабар берди.
Мазкур суперяхта 2022 йилда Гамбург портида ҳибсга олинганди. Суд ушбу яхтага Усмоновнинг алоқадорлиги бўйича илгари чоп этилган мақолаларни “ҳақиқатга тўғри келмайди” деб топди. Агар тақиқ бузилса, жавобгар ҳар бир ҳолат учун 250 минг еврогача маъмурий жаримага тортилиши мумкин. Агар суммани ундиришнинг имкони бўлмаса, суд маъмурий қамоқ тарзидаги жазо (олти ойдан икки йилгача) тайинлайди.
Даъвога Luxembourg Times газетасидаги мақола сабаб бўлган. Унда Алишер Усмонов яхтага “компания ва траст орқали” эгалик қилиши таъкидланган. Бироқ бу даъво юридик асосга эга эмаслиги маълум қилинган. Ҳозирда мақоладаги баҳсли парча олиб ташланган.
2023 йилдан бошлаб Усмоновнинг адвокатлари Германияда тадбиркорга тегишли мулк борлигини ёзган бошқа нашриётларга нисбатан ҳам ўнта суд қарори ва тақиқига эришган. Миллиардернинг вакиллари бу мулклар қайтариб олинмайдиган трастларда эканини ва уларнинг бошқарувчиларига тегишли эканини исботлаган.
Уларнинг ҳуқуқий асоссизлигига, шунингдек, мақола қисмлари кейинчалик олиб ташлангани ёки тузатилганига қарамай, бу мақолалар Европа Иттифоқининг Усмоновга қарши санкциялари тўғрисидаги тергов материаллари ва ҳужжатларида тилга олинган, дейди миллардернинг манфаатларини ҳимоя қилувчи медиаюрист Ёахим Штайнхефел.
Ҳуқуқшуноснинг сўзларига кўра, “Европа Иттифоқи прокуратураси ва санкция берувчи органларининг обрўсизлантирилган ва суд томонидан тақиқланган ОАВ материалларига таяниши процессуал қонунбузарликлар борасида жиддий хавотир уйғотмоқда”.
Европа Иттифоқи Алишер Усмоновга қарши санкцияларни 2022 йил 28 февралда, АҚШ ва Британия ўша йилнинг 3 мартида, Канада эса11 мартида киритган. Апрель ойида Гамбург портида Усмоновга алоқадор деб қаралган 156 метрлик “Дилбар” яхтаси қўлга олингани ҳақида хабар пайдо бўлган.
Изоҳ (0)