БААда озиқ-овқат маҳсулотларининг нархи қанча? Тошкент ва Рас ал-Ҳайма бозорларини таққослаймиз

Бирлашган Араб Амирликларининг 2022 йилдаги ялпи ички маҳсулоти ҳажми 503 миллиард долларни ташкил этган бўлиб, бу жон бошига 47 минг 792 доллардан тўғри келади, дегани. БАА иқтисодиёти бир йил аввалгига қараганда 3,8 фоизга ўсиб, умумий масштабда Яқин Шарқ бўйича бешинчи ўринда кетмоқда. Хўш, жадал ривожланиш босқичидаги ушбу давлатда озиқ-овқат маҳсулотларининг нархлари қанақа? Ўзбекистон билан солиштирганда қимматроқми ёки фуқаролар кундалик истеъмол учун Тошкентдагидан камроқ пул сарфлайдими? “Дарё” мухбири шу саволларга жавоб излаб Рас ал-Ҳаймадаги ҳар кунлик маҳсулотлар нархларини ўрганди.

Шаҳардаги энг катта савдо марказларидан биридаги нархлар билан танишар эканмиз, рўйхати шакллантириладиган маҳсулотларни иккита гуруҳга ажратдик. Бирига сабзавотлар, мевалар ва полиз экинларини кирицак, иккинчи гуруҳдан гўштлар, ўсимликлардан олинадиган иккиламчи маҳсулотлар ўрин олади.

Маҳсулотларнинг тахминий ўртача нархи БАА дирҳами ҳамда ўзбек сўмида кўрсатилади (30 май санасига кўра, 1 дирҳам 3109 сўмни ташкил этади). 

Озиқ-овқат маҳсулотлари

Сут: 1 литри 12—14 дирҳам. Сўмда: 37000—43000 сўмни ташкил этади. Тошкентда: 12000—15000 сўм.

Шакар: 1 килограмми сифатига қараб 4,9—12,25 дирҳам. Сўмда: 15000—38000 сўм. Тошкентда 11000—14000 сўм.

Чой: 25 та пакетлиси 8—10 дирҳам. Сўмда: 25000—31000 сўм. Тошкентда: 20 пакетчали чой 25000—30000 сўм.

Нон: қадоқланган ҳолатда 3,8 дирҳам. Сўмда: 12000 сўм. Тошкентда: 8000—10000 сўм.

Тухум: 15 донаси 11,6 дирҳам. Сўмда 36 минг сўм. Тошкентда 15000—18000 сўм.

Балиқ: бутун салмон балиғи 49,95 дирҳам. Сўмда 155 минг сўм. Тошкентда асосан сазан балиқлар сотилади: 50000—60000 сўм.

Мол гўшти: 1 килограмми 38,45 дирҳам. Сўмда 120 минг сўм. Тошкентда: 75000—80000 сўм.

Товуқ гўшти: 1 килограмми 23,45—30,45 дирҳам. Сўмда: 73000—95000 сўм. Тошкентда 35000—45000 сўм.

Ёғ: 1,5 литри 13—15 дирҳам. Сўмда 40000—46000 сўм. Тошкентда: 22000—25000 сўм.

Туз: 200 грамми ўртача 10—13 дирҳам. Сўмда: 31000—40000 сўмгача. Тошкентда: 5000 сўм.

Мева ва полиз экинлари (килограммда)

Картошка: 2,50 дирҳам. Сўмда: 7800 сўм. Тошкентда: 3000—6000 сўм.

Гуруч: навига қараб 9,15 дирҳамдан бошланади. Сўмда: 28000 сўмдан. Тошкентда: 10000—30000 сўм оралиғида.

Олма: 8,95 дирҳам. Сўмда: 28000 сўм. Тошкентда: 15000—20000 сўм.

Apelsin: 13,35 дирҳам. Сўмда: 41600 сўм. Тошкентда: 18000—25000 сўм.

Лимон: 5,85 дирҳам. Сўмда: 18200 сўм. Тошкентда: 15000—20000 сўм.

Банан: 4,5 дирҳам. Сўмда: 14000 сўм. Тошкентда: 18000—25000 сўм.

Тарвуз: 2,9 дирҳам. Сўмда: 9000 сўм. Тошкентда: 5000—7000 сўм.

Қовун: 7—14,75 дирҳам. Сўмда: 22000—46000 сўм. Тошкентда: 10000—17000 сўм

Помидор: 2,95 дирҳам. Сўмда: 9000 сўм. Тошкентда: 7000—10000 сўм.

Бодринг: 2,95 дирҳам. Сўмда: 9000 сўм. Тошкентда: 4000—6000 сўм.

Сабзи: 5,7 дирҳам. Сўмда: 17700 сўм. Тошкентда: 4000—6000 сўм.

Пиёз: 5,95 дирҳам. Сўмда: 18500 сўм. Тошкентда: 4000-6000 сўм.

Кўриниб турибдики, Бирлашган Араб Амирликларида нархлар сезиларли даражада баланд. Аммо шуни унутмаслик керакки, аҳолининг ўртача даромади ҳам шунга яраша юқори. Мисол учун, ўртача БАА фуқароси йилига 63 минг доллар даромад топса, бу кўрсаткич ўртача ўзбекистонликда 3500—4000 долларни ташкил қилади.