22 ёшли Томас Фюгейт экстремизм, мактабдаги отишмалар ва нафрат туфайли содир этиладиган зўравонликларга қарши курашиш учун 18 миллион доллар ажратадиган АҚШ Профилактика ва ҳамкорлик дастурлари марказига раҳбар этиб тайинланди. Бу ҳақда The Independent хабар бермоқда.
Маълум қилинишича, соҳа бўйича тажрибага эга бўлмаган йигит илгари ландшафт дизайни билан шуғулланган ва озиқ-овқат дўконида ишлаган.
Май ойида қабул қилинган ушбу қарор Демократик партия аъзолари томонидан танқидга учраган. Айниқса, Эронга берилган зарбалардан сўнг юзага келган кескин вазият ва террорчилик ҳужумлари хавфи ортиб бораётгани ҳисобга олинса, бу танқид янада кучайган.
Heritage Foundation ўнг-консерватив тадқиқот жамғармасининг собиқ амалиётчиси ва Дональд Трамп тарафдори бўлган Фюгейт “ютуқлари учун” вақтинчалик раҳбарлик ваколатини олган. Бироқ нашрнинг ёзишича, ташкилот ходимлари унинг малакасизлигидан шикоят қилмоқда.
Таъкидланишича, Фюгейтнинг сиёсий карьера зинапоясидан кўтарилиши у диплом олгач бошланган. У шов-шувли Project 2025 муаллифлари ва Техаслик икки конгрессмен — Терри Уилсон ҳамда Стив Allison офисларида амалиёт ўтаганидан сўнг республикачи Дональд Трампнинг сайловолди жамоасига ишга қабул қилинган.
Трампнинг ғалабаси ва инаугурациясидан кейин у ДҲС иммиграция бўлимида “махсус ёрдамчи” лавозимига тайинланган. Кўп ўтмай эса Профилактика ва ҳамкорлик дастурлари маркази раҳбари этиб тайинланган. Бу бўлим мактаблардаги зўравонлик, жумладан, терроризм ва отишмаларнинг олдини олиш дастурларини молиялаштириш ва ташкил этиш билан шуғулланади.
Маълумотларга кўра, Фюгейтнинг тайинланиши марказ билан ҳамкорлик қилувчи нодавлат ташкилотларни ҳам ташвишга солган. Улар, худди журналистлар сингари, марказга ким раҳбарлик қилаётганини унинг LinkedIn’даги онлайн резюмесидан билиб олишган ва суратда чап қоши юқорига кўтарилган “коллеж талабаси”ни кўришган.
Изоҳ (0)