Президентнинг “Давлат фуқаролик хизматини янги ёндашувлар асосида ташкил этиш ҳамда профессионал ва натижадорликка йўналтирилган давлат хизматчилари корпусини шакллантириш чора-тадбирлари тўғрисида”ги фармони қабул қилинди. Бу ҳақда ЎзА хабар берди.
Қарор билан давлат хизматчилари ўртасида соғлом турмуш тарзини тарғиб қилиш мақсадида 2025 йил 1 августдан бошлаб давлат органлари ва ташкилотларида ҳар иш кунининг муайян вақтларида жисмоний тарбия ва ҳаракат фаоллиги бўйича тадбирлар ўтказилади.
Давлат органлари ходимларнинг вакиллик органлари билан ҳамкорликда имкониятдан келиб чиққан ҳолда ташкилот ҳудудида спорт зоналари ташкил этилади. Ходимлар жисмоний тарбия билан шуғулланиши учун зарур шарт-шароитлар яратилади.
Шунингдек, спорт тарғиботчилари томонидан ходимлар ўртасида тана вазни индекси ўлчаб борилади ҳамда ҳар бир ходим бўйича маълумотлар “ҳрм.аргос.уз” платформасига мунтазам киритиб борилади.
Бундан ташқари, давлат хизматчилари ўртасида соғлом турмуш тарзини жорий этиш мақсадида жисмоний тарбия ва ҳаракат фаоллиги бўйича тавсиявий тадбирлар ва жиҳозлар рўйхати ҳамда уларнинг меъёрлари тасдиқланади.
2026 йил 1 январдан бошлаб давлат хизматчилари йилига камида бир марта тиббий кўрикдан ўтказилади. Давлат органлари 2026 йил 1 январдан бошлаб ўзларига тегишли бўлган ошхоналарни тўлиқ аутсорсинг асосида ташкил этади. Уларда соғлом овқатланиш кенг жорий қилинади ҳамда ширинликлар, ёғли, хамир солинган озиқ-овқат маҳсулотлари ва таомлар, шунингдек, одам соғлигига салбий таъсир кўрсатувчи бошқа турдаги маҳсулотларнинг савдоси чекланади.
Ўзбекистонда 2026 йил 1 январдан бошлаб давлат хизматчилари лавозим маоши уларнинг иш тажрибаси, илмий ва малака даражаси, натижадорлиги ҳамда бошқа кўрсаткичлардан келиб чиқиб шакллантирилиши ҳақида хабар берилганди. Шунингдек, давлат хизматчилари хизмат сафари режаси ва натижалари, географияси, ходимлар сони ҳамда харажатларни онлайн кузатиб бориш имконияти яратилади.
Изоҳ (0)