Тоза сувнинг фойдалари ҳақида ҳамма ҳам билади. Аммо фақат бир нечта одамгина кунига икки литр сув ичишга риоя қилади. У ҳолда аксарият инсонлар организмга етишмаётган суюқликни қайси маҳсулотлардан олиши мумкин? «Домашний очаг» нашри ушбу саволга жавоб тариқасида бир нечта маҳсулотлар рўйхати билан бўлишди.
Статистик маълумотларга кўра, одам озиқ-овқат маҳсулотларидан бир кунлик суюқлик миқдорининг тахминан 20-30 фоизини олади. Албатта, бу ажабланарли эмас чунки баъзи маҳсулотлар таркибида 90 фоиз ёки ундан кўп намлик мавжуд.
Айсберг салат барги — сув таркиби: 95,64 фоиз
Аслида, бу баргли сабзавотда сувдан бошқа ҳеч нарса йўқ. Унинг бошқа турлари кўпроқ озуқавий моддаларни ўз ичига олади. Аммо Айсбергнинг шубҳасиз бир афзаллиги ҳам бор — у кам калорияли маҳсулотлар қаторига киради.
Селдер — сув миқдори: 95,43 фоиз
Селдер вазн йўқотмоқчи бўлганлар учун ажойиб танловдир. Унда Айсбергга қараганда бир оз камроқ сув бор, лекин айни пайтда у том маънода намлик билан тўйинган.
Турп — сув таркиби: 95,27 фоиз
Сувли турп асосий таомга ажойиб қўшимчадир. Сабзавот овқат ҳазм қилишни яхшилайдиган ва организмга инфекцияларга қарши туришга ёрдам берадиган антиоксидант, витамин ва минералларга бой.
Бодринг — сув таркиби: 95,23 фоиз
Кўз атрофи терисини парвариш қилишда бодринг абадий классикадир. Сабзавот шишни камайтиришига қўшимча равишда, терини намлик билан тўйинтиришга қодир — ташқи томондан ҳам, истеъмол қилинганда ҳам. Шунингдек, маҳсулот К витамини, калий ва магнийни ўз ичига олган фойдали озиқ моддалар мажмуаси ҳамдир.
Қовоқча — сув таркиби: 94,79 фоиз
Қовоқча ҳам сувга бой табиий маҳсулотлардан бири ҳисобланади. Шу билан бирга, сабзавот таркибидаги калория миқдори шунчалик камки, уни ҳатто кечаси ҳам истеъмол қилиш мумкин.
Помидор — сув таркиби: 94,52 фоиз
Помидорни яхши кўришнинг бир қанча сабаблари бор. Помидор намлик билан тўйинтиришдан ташқари, гематопоэтик тизимнинг фаолиятини яхшилайди, қон томирлари ва юрак хуружи хавфини камайтиради ҳамда остеопороз ривожланишининг олдини олишга ёрдам беради.
Булғор қалампири — сув таркиби: 93,89 фоиз
Булғор қалампирида, хилма-хиллигидан қатъи назар, кўп миқдорда сув мавжуд. Бундан ташқари, сабзавот клетчатка, калий ва C витаминига бой — улар иммунитет учун ҳақиқатан ҳам зарур бўлган озуқа моддалари саналади.
Бақлажон — сув миқдори: 92,3 фоиз
Бақлажондан мазали таом ва иштаҳа очар салатлар тайёрлаш мумкин. Унинг истеъмол орқали соғлом клетчатканинг яхшигина қисмига эга бўлиш мумкин, қолаверса, сабзавот юрак-қон томир касалликлари хавфини камайтиради.
Гулкарам — сув таркиби: 92,07 фоиз
Гулкарам кўринишидан сувли сабзавотга ўхшамайди, лекин у сув миқдори бўйича энг яхши 10 та маҳсулот қаторига киради. Бундан ташқари, карам кўплаб фойдали моддаларга, жумладан, метаболизм ва асаб тизимининг фаолиятини қўллаб-қувватлайдиган холин (витамин B4)га бой.
Тарвуз — сув таркиби: 91,45 фоиз
Ажабланарлиси шундаки, сувли тарвуз ушбу рейтингда ўнинчи ўринни эгаллади. Унда жуда кўп намлик борлигига шубҳа йўқ. Бундан ташқари, тарвуз таркибида саратон, қандли диабет ва юрак хасталикларининг ривожланишига тўсқинлик қилувчи муҳим антиоксидант ликопен мавжуд.
Исмалоқ — сув миқдори: 91,4 фоиз
Исмалоқ иссиқлик билан ишлов бериш пайтида ҳам асосий намликни сақлаб қолади, пиширилгач юмшоқ ва сувли бўлади. Сабзавот таркибида кальций, магний ва калий — суяклар учун зарур бўлган элементлар ҳам мавжуд.
Қулупнай — сув таркиби: 90,95 фоиз
Баҳор фаслининг сўнгги ойига келиб, қулупнай мавсуми бошланади. Резавор антиоксидантларга бой. Олимларнинг таъкидлашича, қулупнайни истеъмол қилиш Альцгеймер касаллиги ва гипертония хавфини камайтиради.
Сабзи — сув таркиби: 90,35 фоиз
Сабзи ҳам деярли 90 фоиз сувни ўз ичига олади. Шунингдек, кўзлар учун зарур бўлган А витамини ва бета-каротиннинг бой манбаидир.
Қовун — сув таркиби: 90,15 фоиз
Қовун кам калория ва соғлом клетчаткани ўз ичига олади. А витаминининг дозаси ҳақида гапирмаса ҳам бўлади. Қовун нафақат мазали, балки фойдали томонларга ҳам бой.
Грэйпфрут — сув таркиби: 90 фоиз
Рўйхатнинг сўнгги қаторини сувли цитрус — грейпфрут эгаллади. Сув таркибига кўра, у мандарин ва апельсинлардан кейинда туради. Бундан ташқари, мева C витамини ва саратонга қарши хусусиятларга эга бўлган фитонутриэнтларга бой.
Изоҳ (0)