Банан томир тортишганда, брокколи юракка, булғор қалампири эса милк касаллиги учун шифодир. Саломатликка фойдали 9 та мева ва сабзавотни айнан қайси касалликларда даво бўлишини эътиборингизга ҳавола қиламиз, деб ёзади “Новий очаг” нашри.
Брокколи ва Соба лапшаси юракка шифо
Артерия қон томири деворларини “беркитиб” қўядиган, юрак ва қон томир касалликларини келтириб чиқарадиган зарарли холестерин зарраларининг оксидланиши натижасидир. Улар билан курашиш учун организмга махсус антиоксидантлар — Соба лапшалари таркибида кўп бўлган рутин моддаси керак. Аммо бу антиоксидантлар янада самарали ишлаши учун, масалан, C витаминига бой брокколини у билан бирга истеъмол қилиш лозим.
Кўпроқ энергия учун пиёз ва нўхат
Темир ҳужайраларга кислород етказиб бериш учун масъул бўлган микроэлементдир. Темир танқислиги натижасида чарчоқ, бош айланиши ва ҳолсизлик кузатилади. Витамин ва қўшимчалар қабул қилишингиз мумкин ёки кўпроқ дуккакли маҳсулотлар (масалан, нўхат) билан бирга пиёз, саримсоқ истеъмол қилишни унутманг. Сабзавотлар таркибидаги олтингугурт бирикмалари темир ва синкнинг яхшироқ сўрилишига ёрдам беради.
Тофу ва Чили қалампири – яллиғланишга қарши
Организмда шаклланадиган яллиғланиш жараёнлари юрак ва қон томирларнинг соғлиғига хавф туғдиради, жиддий касалликлар, ҳатто, саратон ўсмасининг ривожланишига сабаб бўлади. Энг ёмони, улар узоқ вақт давомида яширин шаклда давом этишидир. Соя маҳсулотларида (масалан, тофу) мавжуд бўлган генистеин бирикмаси яллиғланишни камайтириши, жараённи бутунлай тўхтатиши мумкин. Унинг таъсири кучли бўлиши учун Чили қалампирида кўп учрайдиган антиоксидант капсаицин микроэлементи керак. Ҳафтада бир марта қалампир қўшилган тофу — бу яллиғланишнинг ажойиб профилактикаси бўла олади!
Қизил булғор қалампири ва помидор — милкларни ҳимоя қилади
C витамини танқислигининг биринчи аломати терининг тезда шикастланиши, яраларнинг секин битиши ва милкнинг қонашидир. Ушбу муаммонинг олдини олиш учун қизил қалампир, салат барги, карам, помидор ва, албатта, цитрус меваларини кўпроқ истеъмол қилишга ҳаракат қилинг.
Ясмиқ — сурункали чарчоқдан халос қилади
Қувват ва шижоатнинг етишмаслиги таомномангизда фолий кислотаси, барра сабзавотларда мавжуд бўлган Б витамини ва нўхат, ловия, ясмиқ каби дуккаклилар етишмаслигидан келиб чиқади.
Барра сабзавотлар — шамоллаганда
Рационда барра сабзавотларнинг етишмаслигининг яна бир белгиси шамоллаш тенденциясининг кучайиши ҳисобланади. Иммунитет тизимида C витамини етишмайди ва бу ҳолатда цитрус мевалари ҳам, барра сабзавотлар ҳам ёрдам бера олади. Қоида — мунтазам равишда!
Маккажўхори — кучли хотира учун
Лутеин — бу янги маълумотларни яхшироқ ўзлаштиришга ва хотирада узоқроқ сақлашга ёрдам берадиган озуқа моддаси. У сабзи, брокколи, маккажўхори, помидор ва кўкатларда кўп. Агар ўқишда қийналаётганингизни ёки хотирангиз билан боғлиқ муаммоларга дуч келсангиз, ушбу сабзавотларни диэтангизга қўшиб кўринг. Ёрдам бериши аниқ!
Резаворлар — стрессга қарши восита
Стресс ҳаётимизнинг ажралмас қисмидир, лекин у билан қандай курашишни ўрганиш жуда муҳим, чунки тажрибасиз организмнинг стрессга жавобларидан бири бу яллиғланиш жараёнидир. Шунинг учун ҳар доим рационингизда антиоксидантлар, полифеноллар ва каротиноидлар каби яллиғланишга қарши бирикмаларга бой озиқ-овқатлар бўлиши жуда муҳимдир. Уларнинг барчаси турли хил сабзавотлар ва меваларда, лекин энг асосийси — резаворларда мавжуд.
Мушаклар тортишганда банан ва тарвуз
Мушак тортишишининг пайдо бўлишининг олдини оладиган муҳим микроэлемент калийдир. Ҳаддан ортиқ спорт билан шуғулланганда ёки иссиқ мавсумда тез-тез кўчага чиққанда, умуман, шу каби ҳолатларда таомномада калий моддасининг кўп бўлиши муҳимдир. Бундан ташқари, ушбу модда юракнинг меъёрий фаолияти учун зарур. Кундалик калий танқислигини тўлдиришнинг энг осон йўли бу банан истеъмол қилишдир. Битта ўртача катталикдаги мевада тахминан 420 мг калий мавжуд.
Мавзуга доир:
Изоҳ (0)