Корейсларнинг юз териси парвариши кун сайин оммалашмоқда. Кўпчилик уларнинг мато ниқобларини ҳеч бўлмаса бир марта синаб кўрган. Кореялик аёлларнинг силлиқ териси ҳаммани ҳайратда қолдиради. Мақолада юз териси парваришида фойдали бўладиган бир нечта оддий қоидалар ҳақида сўз боради.
Икки босқичли тозалаш
Кореялик аёллар ҳеч қачон макияж билан ухламайди: бу терига жуда зарарли. Корейслар юзини оддий сув ва совун билан ювмайди. Уларнинг парвариш жараёни бир неча босқичда амалга оширилади. Бу юзни тозалашга ҳам тегишли. Тонгда ёки кечқурун юзни тозалашдан қатъий назар, аввало гидрофил ёғидан фойдаланиш керак. У макияж ва қуёшдан ҳимоя креми қолдиқларини мукаммал олиб ташлайди, ортиқча ёғ ва ўлик тери ҳужайралари билан осонгина курашади.
Кейин эса, сув асосидаги ҳар қандай воситадан фойдаланиш мумкин. Бу теридаги чанг, тер ва бошқа крем қолдиқларини тозалайди. Кўплаб мутахассислар бунинг учун юзни ювиш кукуни (пудраси)ни тавсия қилади.
Юзни тозалашдан олдин қўлларни ювиш ҳам жуда муҳим босқичдир. Агар бу кичик нарсани унутиб қўйсангиз, фойдали парвариш ўрнига юзга микробларни суртиб олишингиз мумкин.
Намлантирувчи ниқоблар
Корейсларнинг мато ниқобларидан фойдаланиши аслида янгилик эмас. Улар кўп йиллардан бери машҳур. Қулай қадоқ, намловчи восита ёки серумларга ботирилган ниқоб ва 15 дақиқалик дам олиш: Бундан яхши нима бўлиши мумкин? Бундай парвариш ҳафтасига 1-2 марта терингизга кучли озиқлантириш ва чуқур намланишни таъминлайди. Мато ниқобларнинг айнан ёпишқоқлик хусусиятлари уларни самарали қилади.
Сўнгги пайтларда мато ниқоблар билан бир қаторда тунги ниқоблар ҳам машҳур бўлиб бормоқда. Улар қалин крем ёки гелга ўхшайди. Бу ниқобларни тун бўйи ёки қисқа вақт давомида қўллаш мумкин. Мато ниқоблар каби, тунги ниқоблар ҳам терини яхши намлайди, уни янада майин ва силлиқ қилади. Албатта, ҳар иккисини ҳам тери турига мослаб танлаш тавсия этилади.
Корейс аёлларидан терини парвариш қилиш ёки макияж воситаларини қўллаш усули бўйича фойдали маслаҳатни ўрганиш мумкин.
Рационда кимчининг мавжудлиги
Кўп ҳолларда терининг соғлиги фақат ишлатиладиган кремнинг сифатига эмас, балки нимани ейишимизга ҳам боғлиқ. Кимчи — корейсларнинг анъанавий егулиги бўлиб, тузланган сабзавотлардан иборат гарнирдир. Кўпинча бу карам ёки редиска бўлади. Аммо кимчи оддий егулик эмас. У ҳазм қилиш тизими учун фойдали бўлган пробиотиклар манбаи ҳисобланади.
Сабзавотларнинг кислоталаниши терига қандай ёрдам беради? Ҳаммаси оддий: ичакнинг ҳолати тўғридан-тўғри терининг ҳолатига таъсир қилади. Агар ҳазм қилиш билан боғлиқ муаммолар юзага келса, терида турли тошмалар пайдо бўлади. Пробиотиклар ичакдаги микроорганизмлар мувозанатини тиклайди, демак, тери ҳам яхшироқ кўринишга эга бўлади.
Бундан ташқари, кимчи тўғридан-тўғри тери учун ҳам фойдалидир. Пробиотиклар организмдаги яллиғланиш жараёнларини камайтиради ва акне, экзема ёки розация каби тери касалликлари билан кураша олади. Шунингдек, сурункали яллиғланиш коллагеннинг камайишига олиб келиши мумкин.
Пробиотиклар терининг ҳимоя функцияларини яхшилаши мумкин. Улар теридаги намликни ушлаб туришга ёрдам берувчи липидлар ва серамидларга таъсир кўрсатади ҳамда атроф-муҳитнинг зарарли таъсиридан ҳимоя қилади.
Аммо қандай қилиб ўз рационимизга шу қадар кўп тузланган сабзавотларни қўшамиз? Кимчини тухум ёки шўрвага қўшиб кўринг — шунда нафақат соғлигингиз учун фойда оласиз, балки оддий таомларга янги таъм ҳам қўшасиз.
Албатта, фақат кимчи билан соғлом терига эришиб бўлмайди. Тери яхши ҳолатда бўлиши учун етарлича сув ичиш ва яхши ухлаб олиш ҳам муҳимдир. Аммо бу қоидаларни тўғри бажариб, сифатли тери парваришини ҳам қўшсангиз, терингиз ялтирайди.
Юз учун массаж ва гимнастика
Юз ёгаси — бу аввало ўзингизга ғамхўрлик қилишдир. Анъанавий корейс машқлар техникаси юздаги муҳим мушакларни ишлатишга ёрдам беради ва шунинг учун терингиз “тирилади”. Бундан ташқари, ушбу машқлар давомида нафақат дам олиш, балки гўзаллик ҳақида ўйлаш ҳам мумкин.
Массаж учун турли асбоб-ускуналардан фойдаланиш мумкин. Гуаш юз чизиқларини шакллантиришда ёрдам беради, нефрит ёки музли роллерлар эса шишларни камайтиради ва стрессни енгиллаштиради. Бундан ташқари, Кореяда ҳозир лимфодренаж массажи жуда машҳур бўлиб, у юз шаклини яхшилайди ва ҳатто асимметрияни ҳам тўғрилаши мумкин.
Етти босқичли усул
Ушбу усул терига тонерни етти марта суришни назарда тутади. Ҳеч қандай мураккаблик йўқ. Асосийси шундаки, агар биз одатдагидек тонерни бир марта сурцак, тери ҳаммасини шимиб олишдан олдин, маҳсулотнинг бир қисми ҳавога учиб кетади. Қатламлаш эса терининг имкон қадар кўпроқ фойдали моддаларни қабул қилишига ёрдам беради. Бу нафақат тонер, балки тоник, эссенсия ва серумларга ҳам тегишлидир.
Мана шундай оддий усул ёрдамида терингиз ҳар куни гўё косметологдан чиққандек ялтирайди. Энг муҳими — сиз кўп вақт ва пул сарфлашингиз шарт эмас. Терини тозалагандан сўнг, пахта диски ёрдамида намлик бир оз қолган юзга мос келадиган тонердан биринчи қатламни суртинг. Муҳим томони, маҳсулотда спирт ёки бошқа зарарли кимёвий моддалар бўлмаслиги, балки намловчи ва тинчлантирувчи таъсирга эга бўлишидир. Тонерни бармоқлар билан секин суриш ҳам мумкин.
Кейин биринчи босқични яна олти марта такрорланг. Қатламлар сони ҳар доим еттита бўлиши шарт эмас. Вақт ўтиши билан сиз тонерни неча марта суриш кераклигини, терингиз учун қайси даражада идеал намлик ҳосил бўлишини билиб оласиз. Баъзи мутахассислар бир хил тонерни эмас, балки бир нечта турини кетма-кет суришни тавсия қилади. Асосийси, улар ҳидли бўлмаслиги ва терини дағаллаштирувчи ёки қуруқлаштирувчи таъсирга эга бўлмаслиги керак. Етти қатлам усулининг асосий вазифаси — терини чуқур ва самарали намлантиришдир.
Гуруч асосидаги воситалар
Гуруч таркибли парвариш косметикаси намловчи, антиоксидант ва терини оқартирувчи хусусиятларга эга. У эрта қаришга қарши самарали курашади. Масалан, гуруч суви асрлар давомида Осиё гўзаллик маросимларида қўлланилиб келган. Ҳали бу воситанинг ноёблиги илмий жиҳатдан исботланмаган бўлса-да, у албатта яллиғланишни камайтиради ва терини тинчлантиради.
Шиллиқурт суюқлиги
Бир неча йилдан бери шиллиқурт суюқлиги асосидаги тери парвариши воситалари бутун дунё бўйлаб машҳур бўлиб келмоқда. Бунга ҳайрон қолмаслик керак. Чунки унинг таркибий қисми гиалурон кислоталари, протеинлар, мис ва антимикробли пептидлар, антиоксидантларга бой. Шиллиқурт суюқлиги терини яхши намлай олади. Суюқлик миқдори кўп бўлган маҳсулотларни танланг. Бу тониклар, крем ва мато ниқоблар бўлиши мумкин. Шундай қилиб, терингиздаги безовталик камаяди.
Қуёшдан ҳимояловчи крем
SPF (қуёшдан ҳимоя қилувчи воситалар) ишлатиш — ҳақиқий корейс анъанаси ҳисобланади. Ҳар куни қуёшдан ҳимоя қилиш терини парвариш қилишнинг ажралмас қисмидир. Бу терининг соғлом ва порлоқ қолишини иложи борича узоқроқ таъминлайди. Кўп ҳолларда аёллар қуёш креми ёғлилик даражасидан норози бўлади. Баъзилари ёғли, баъзилари суюқ, яна баъзилари эса терида жуда қалин туюлади. Технологиялар ривожланмоқда ва дўконларда тобора кўпроқ енгил таркибга эга SPF маҳсулотларини учратиш мумкин.
Бўйинни ҳам унутманг: кореялик аёллар терини парваришлашда жағ соҳасида тўхтамайди. Юзга суртадиган барча воситаларни бўйинга суртиш мумкин ва керак. Бу тонер, серум, крем ва ҳатто мато ниқобларга ҳам тегишли.
Изоҳ (0)