SpaceX компанияси асосчиси Илон Маск 24 август куни навбатдаги Starship ракетасининг учирилишини сўнгги дақиқада бекор қилди. Бу ҳақада The Guardian хабар берди.
Компания бунга ердаги тизимда муаммо сабаб бўлганини маълум қилган. Навбатдаги учириш санаси ҳозирча номаълум. Бу Starship’нинг ўнинчи марта парвозга уринишидир. Бунгача бўлган 9 та тест парвозидан атиги 4 таси муваффақиятли бўлган. Сўнгги уринишларда кучли портлашлар юз бериб, ракета қолдиқлари Кариб денгизи оролларигача етиб борган эди.
Бу сафарги синов парвози Техасдаги Starbase мажмуасида бўлиб ўтиши ва илк бор Starlink сунъий йўлдошларининг синов версиясини учириш режалаштирилган эди. Илон Маск ижтимоий тармоқларда одатдагидек фаол чиқишлар қилмай, фақатгина “Starship учишга тайёрланмоқда” деган пост билан чекланган.
Starship ҳозирда инсоният тарихидаги энг йирик ракета бўлиб, Маск уни Ой ва Марсга парвозлар учун тўлиқ қайта ишлатиладиган транспорт воситасига айлантирмоқчи. Унга кўра, 2026 йилда астронавтсиз, 2029 йилда эса инсонлар билан Марсга парвозлар йўлга қўйилиши режалаштирилган.
Айни пайтда, Starship парвозлари экологик муаммоларни ҳам юзага келтирмоқда. Экологлар АҚШ—Мексика чегараси ва Гавайидаги парвозлар маҳаллий экотизимга салбий таъсир кўрсатиши мумкинлигидан хавотир билдирмоқда.
Изоҳ (0)