Аргентинанинг “Ривер Плейт” клуби футболчиси Франко Мастантуоно фаолиятини Испаниянинг “Реал Мадрид” жамоасида давом эттиради. “Қаймоқранглилар” раҳбарияти 17 ёшли вундеркинднинг шартномасида кўрсатилган товон пули — 45 миллион еврони тўлашга рози бўлди. Футболчининг ўзи ҳам трансферга “яшил чироқ ёққан.”
ТйC Спорц нашрининг хабар беришича, келишув аллақачон якунланган. Эндиликда Мастантуоно “Реал” сафига қачон қўшилиши борасидаги савол очиқ қолмоқда. Трансфер клублар ўртасидаги Жаҳон чемпионати бошланишидан олдин ёки мусобақа якунлангач амалга оширилиш эҳтимоли бор. Ҳозир томонлар бу борада музокаралар олиб бормоқда.
Аввалроқ, Мастантуоно Парижнинг “ПСЖ” клубига ўтиши мумкин эди, бироқ “Реал”дан таклиф тушгач, у фикрини ўзгартирди ва мадридликлар билан шартнома имзолашга рози бўлди. Шунингдек, футболчига “Милан” ва “Атлетико” клублари ҳам қизиқиш билдирган.
Жорий мавсумда Франко Мастантуоно “Ривер Плейт” таркибида 17 та ўйинда майдонга тушиб, ўз ҳисобига 6 та гол ва 4 та голли узатма ёздириб қўйган. Унинг клуби билан шартномаси 2026 йилнинг охиригача амал қилади. Transfermarkt портали Мастантуононинг қийматини 15 миллион еврога баҳолаган.
Изоҳ (0)