Европа футболида навбатдаги «катта қайта қуриш даври» — трансферлар ойнаси якунига етмоқда. Хусусан, Англияда ёзги трансферлар ойнаси ёпилди. Янги мураббийлари, янги футболчилари — кўп нарса ўзгарди. Агар сиз ёзги трансферлар ойнасини диққат билан кузатмаган бўлсангиз, ҳечқиси йўқ. Биз сизни уларнинг асосийлари билан таништиришга тайёрмиз. Хўш, Европанинг топ-клублари таркиби қанчалик ўзгаришларга учради.
«Атлетико Мадрид»
Мадриднинг бир йўла иккала жамоаси ҳам ёзги трансферлар вақтида катта ўзгариршларга қўл урди. «Матрасчилар» сўнгги йиллардан жамоанинг ҳимоясида қалқон вазифасини ўтаган Диего Годин, Филипе Луис, Хуанфран билан хайрлашди. Улар клубни эркин агент сифатида тарк этди. ЖЧ—2018 чемпиони Люка Эрнандес эса 80 миллион евро эвазига «Бавария»га сотиб юборилди. Мадрид клуби кетган футболчилар ўрнини тўлдириш мақсадида трансферлар учун 260 миллион евро сарфлади. Жумладан, «Тоттенҳэм»дан Киран Триппьер, «Атлетико Паранаэнсе»дан Ренан Лоди, «Эспаньол»дан Марио Эрмосо, «Порту»дан Фелипе олиб келинди. Жамоанинг янги ҳимоя чизиғи мазкур ҳимоячилар орқали ташкил этилиши ойдинлашди.Узоқ давом этган трансфер сериалидан сўнг Антуан Гризманн 120 миллион евро эвазига «Барселона»га қўйиб юборилди. Унинг ўрнига эса «Бенфика»дан 19 ёшли бўлажак юлдуз Жоау Феликс олиб келинди. Мадрид клуби футболчи учун Лиссабон клубига 126 миллион евро тўлади. Ярим ҳимояда ўз ўрнига эга бўлган Родри Эрнандес яхшигина маблағ эвазига «Манчестер Сити»га сотилди, унинг ўрни эса «Реал» тарбияланувчи Маркос Льоренте билан тўлдирилди.
Келганлар: Фелипе Монтейро, Маркос Льоренте, Ренан Лоди, Жуан Фелиш, Киран Триппьер, Марио Эрмосо, Иван Шапонич
Кетганлар: Люка Эрнандес, Лусиано Ветто, Желсон Мартинш, Антуан Гризманн, Диего Годин, Хуанфран, Родриго Эрнандес.
«Ювентус»
Турин клубида ҳам ҳамма нарса янгидан бошланмоқда. «Ювентус» ҳам ислоҳотни ҳимоядан бошлади. Хусусан, машҳур трио — Кьеллини, Бардзальи, Бонуччи ва ниҳоят бўлиниши фурсати етди. Бунга сабаб эса Андреа Бардзальининг фаолиятини якунлаши бўлди. Унинг ўрнига эса «Аякс»дан Маттейс де Лигт олиб келинди. Нидерландиялик иқтидор дунёдаги энг қиммат ҳимоячилардан бирига айланди. Бундан ташқари «Рома»дан Лука Пеллегрини олиб келинди. Шу ўринда Турин клубининг бепул трансферларини тилга олмасликнинг иложиси йўқ. Клуб афсонаси Жанлуижи Буффон бир йиллик танаффусдан сўнг яна «Ювентус»га қайтди. ПСЖдан Адриен Рабио, «Арсенал»дан эса Аарон Рэмзи бепул қўлга киритилди.Келганлар: Маттейс де Лигт, Данило, Лука Пеллегрини, Мерих Демирал, Жанлуижи Буффон, Адриен Рабио, Аарон Рэмзи
Кетганлар: Жоау Канселу, Мойзе Кин, Леонардо Спинаццола, Андреа Бардзальи
«Бавария»
Мюнхен клуби сўнгги ўн йилликдаги энг катта ўзгаришлардани бирини бошдан ўтказмоқда. Хусусан, жамоани икки асосий етакчилар — Арьен Роббен ҳамда Франк Рибери тарк этди. Рибери жамоада 9 та соврин ютган бўлса, Роббен бу орада 8 та совринни қўлга киритишга эришди. Икковлон биргаликда умумий ҳисобда «Бавария» учун 185 та гол урди.Энди эса уларнинг ўрнини Кингсли Коман ҳамда Серж Гнабри билдирмасликка ҳаракат қилиб кўради. Жамоа ҳимоя чизиғини ҳам янгилашни бошлаб юборди. Қанотлар ЖЧ—2018 чемпионлари билан тўлдирилди — Люка Эрнандес ва Бенжамен Павар. Ҳужумда эса Роберт Левандовскига ёрдамчи сифатида ёш иқтидор Янн-Фите Арп олиб келинди. Икки йиллик ижарадан сўнг Хамес Родригес «Реал»га қайтариб юборилди, унинг ўрнига эса «Барселона»дан Филиппе Коутиньо олиб келинди.
Келганлар: Леон Даяку, Бенжамен Павар, Люка Эрнандес, Янн-Фите Арп, Фелиппе Коутиньо
Кетганлар: Матс Ҳуммелс, Рафинья, Хамес Родригес, Франк Рибери, Арьен Роббен
ПСЖ
ПСЖ ёзги трансферлар мавсумида катта трансферларга қўл урмади. Аммо ақлли харидларни амалга оширди. Хусусан, ҳимоя чизиғи «Боруссия Д» иқтидори Абду Диалло билан тўлдирилди. Энди у Преснел Кимпембе, Маркиньос ҳамда Тиаго Сильва билан асосий таркиб учун курашади. «Манчестер Юнайтед»ни эркин агент сифатида тарк этган Андер Эррера текинга қўлга киритилди. «Севилья»дан бўлса, сўнгги мавсумда ўзининг қойилмақом голли узатмалари билан кўпчиликни ҳайратда қолдирган Пабло Сарабия сотиб олинди. Бундан ташқари «Эвертон»дан Идрисса Гуйе олиб келинди.Келганлар: Идрисса Гуйе, Абду Диалло, Пабло Сарабия, Андер Эррера
Кетганлар: Мусса Диаби, Кристофер Нкунку, Гжегож Криховяк, Кевин Трапп, Дани Алвес, Жанлуижи Буффон, Адриен Рабио
«Барселона»
«Барселона» бус афар иккита йирик трансферни амалга оширди. «Атлетико Мадрид»дан Антуан Гризманн, «Аякс»дан эса Френки де Йонг каттагина сумма эвазига олиб келинди. Яспер Силессен «Валенсия» сотилиб, унинг ўрнига эса айнан «кўршапалаклар» посбони Нето харид қилинди. Жорди Альбага рақобатчи сифатида «Бетис»дан Хуниор Фирпо трансфери амалга оширилди. Каталонияда бахтини топа олмаган Малком эса «Зенит»га сотиб юборилди.Келганлар: Антуан Гризманн, Френки де Йонг, Хуниор Фирпо, Эмерсон Апаресидо, Марк Кукуреля, Нето
Кетганлар: Малком, Яспер Силлессен, Андре Гомеш, Пако Алькасер, Денис Суарес
«Реал»
Зинедин Зидан «Реал»ни янгиланишини хоҳлаган эди. У бунга қисман бўлса-да эришди. Флорентино Перес яна катта трансферларга қўл урди. 100 миллион евродан ортиқроқ маблағ эвазига «Челси»дан Эден Азар харид қилинди. Сўнгги мавсум «Айнтрахт Франкфурт» сафида порлаган Лука Йович 60 миллион евро эвазига олиб келинди. Ҳимоя чизиғи эса Эдер Милитао («Порту») ва Ферлан Менди («Лион») каби ўйинчилар билан мустаҳкамланди.Келганлар: Эден Азар, Лука Йович, Эдер Милитао, Ферлан Менди, Родриго Гоэс, Такефуса Кубо
Кетганлар: Матео Ковачич, Маркос Льоренте, Тео Эрнандес, Рауль де Томас
FootballHD материали асосида Асрор Абдуназаров тайёрлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)