“Ан-Насср” клуби ҳужумчиси ва Португалия футболининг афсонаси Криштиану Роналду фаолиятини якунлагач, мураббий бўлиш эҳтимоли ҳақида ўз фикрлари билан ўртоқлашди. Бу борадаги саволларга у клуб матбуот хизматига берган интервьюсида жавоб берди.
Мен оддий қолипда фикрлайдиган инсон эмасман. Бошқалардан яхшироқ эмасман, лекин бошқача ўйлайман. Очиғини айтсам, мураббийлик мен учун эмас. Албатта, ҳаётда ҳамма нарса ўзгариши мумкин, бироқ яқин 5, 10, ҳаттоки 20 йил ичида бу соҳага кириш ҳақида ўйлаганим йўқ, — деди Роналду.
Шунингдек, Криштиану Саудия Арабистонига фақат футбол ўйнаш учун эмас, балки мамлакатда давом этаётган ислоҳотларга ҳисса қўшиш мақсадида келганини таъкидлади:
Мен бу ерга фақат тўп тепиш учун келмадим. Мен бу мамлакатни ўзгартириш жараёнининг бир қисми бўлишни хоҳлайман. Ҳа, мен португалияликман, лекин бугун мен аллақачон Саудия Арабистонининг бир қисмиман деб ўйлайман.
Эслатиб ўтамиз, 39 ёшли ҳужумчи яқинда “Ан-Насср” клуби билан шартномасини 2027 йилгача узайтирди.
Маълумот учун, ўтган мавсумда “Ан-Насср” ҳеч қандай совринга эга чиқа олмади. Саудия Арабистони Про Лигасида жамоа 70 очко жамғариб, учинчи ўринни эгаллади. Роналду эса барча мусобақаларда 35 та гол ва 4 та голли узатма билан жамоанинг энг яхши тўпурари сифатида мавсумни якунлади.
Изоҳ (0)