Ал-Жазирага кўра, Исроил ҳужумлари оқибатида Ғазо сектори бўйлаб камида 63 нафар фаластинлик ҳалок бўлган. Шу билан бир вақтда, Исроил қўшинлари Ғазо шаҳрига чуқурроқ кириб бормоқда. Бу халқаро ҳамжамият томонидан ҳудудни эгаллаш ҳамда бир миллионга яқин одамни мажбуран кўчириш режасининг бир қисми сифатида баҳоланмоқда.
Гувоҳлар Ғазонинг “Сабра” маҳалласига Исроил танклари киргани ҳақида маълум қилган. Ҳудуд “Зеитун” маҳалласига яқин жойлашган бўлиб, охирги ҳафталарда мунтазам нишонга олинмоқда. Ал-Аҳли шифохонаси расмийларига кўра, Сабра бомбардимонида бир бола ҳалок бўлган.
Хон-Юнис яқинидаги Асдаа ҳудуди ҳам нишонга олинди. Исроил артиллерияси кўчирилган оилалар жойлашган чодирларга зарба берди. Натижада 16 киши, жумладан 6 нафар бола ҳалок бўлган. Бундан ташқари, кун давомида гуманитар ёрдам излаб чиққан 22 нафар фаластинлик ўлдирилган. Улардан бири Хон-Юнис жануби-шарқидаги “Мораг йўлаги” яқинида, яна бири эса Нетзарим коридори ёнида отиб ташланган.
Очликдан ўлимлар
Фаластин соғлиқни сақлаш расмийларига кўра, охирги 24 соат ичида 8 киши, жумладан, икки бола очликдан вафот этган. Шу тариқа, уруш бошланганидан бери озиқ-овқат етишмаслигидан ҳалок бўлган ғазоликлар сони 281 нафарга етди, улардан 114 нафари болалар.
“Очарчилик одамлар танасини тинчгина емирмоқда, болаларнинг яшаш ҳуқуқини тортиб олмоқда, чодирлар ва шифохоналарни кундалик фожиа саҳнасига айлантирмоқда”, деди Ғазо соғлиқни сақлаш вазирлиги раҳбари Мунир ал-Бурш.
Бирлашган Миллатлар Ташкилоти Ғазада расман очарчилик эълон қилди. Бу Яқин Шарқ тарихида илк бор қайд этилган ҳолатдир. Мутахассисларнинг огоҳлантиришича, ярим миллиондан ортиқ одам “фалокат даражасидаги” очлик хавфи билан юзлашяпти.
БМТ Исроилни “инсонпарварлик ёрдамини мунтазам тўсишда” айблади. Ташкилот бош котиби Антониу Гутерриш эса очликни “инсон қўли билан яратилган фалокат” деб атади.
Халқаро озиқ-овқат хавфсизлиги тизими (IPC) ҳисоботига кўра, ғазоликларнинг қарийб чорак қисми, тахминан 514 минг одам очарчиликда яшаяпти. Сентябрь охирига бориб рақамлар 641 мингга етиши мумкин.
Ғазо соғлиқни сақлаш вазирлиги БМТнинг очарчилик ҳақидаги эълонини “кечиккан бўлса-да, муҳим қадам” деб баҳолади.
“Очликни атайин уюштириш геноцид бобларидан биридир. Бу соғлиқни сақлаш ва бошқа секторларни вайрон қилиш, оммавий қирғин ва авлодларни йўқ қилиш сиёсати билан бирга амалга оширилмоқда”, дейилади баёнотда.
БМТнинг фаластинлик қочқинларга ёрдам бериш агентлиги (UNRWA) ишини мунтазам қоралаб келган Исроил 27 майдан бошлаб АҚШ кўмагида Ғазо гуманитар жамғармасини (GHF) ташкил қилди. Аммо БМТ ва йирик инсонпарварлик ташкилотлари уни ноқонуний деб атаб, мустақиллик ва бетарафлик тамойилларига зид деб баҳолади. Қолаверса, GHF ходимлари ёрдам олиш учун келган фаластинликларга ўт очган ҳолатлар тез-тез кузатилди.
Ғазо соғлиқни сақлаш вазирлигининг маълум қилишича, GHF жорий қилингандан бери 2 076 фаластинлик озиқ-овқат учун навбатда турган вақти ўлдирилган. 2023 йилнинг 7 октябрь санасидан бери эса Ғазода 62 600 дан ортиқ тинч аҳоли қурбон бўлган.
Изоҳ (0)