Туркияда юқори даромадли иш таклифига учиб, алданиб қолган фуқаро Ўзбекистонга қайтарилди. Бу ҳақда Ўзбекистоннинг Истанбулдаги Бош консулхонаси хабар қилди.
Маълум бўлишича, Самарқанд вилоятида яшаб келган ва оилавий низолардан узоқлашишни истаган аёлга ижтимоий тармоқларда ўзини муваффақиятли тадбиркор сифатида танитган туркиялик шахс малака ва тил билими талаб қилинмайдиган, юқори маошли иш ваъда қилган.
Шундан сўнг, у аёлни ишчи визасисиз Туркияга олиб келган ва йўл харажатлари учун қарздорлигини айтиб, фуқаронинг паспортини олиб қўйган ҳолда оғир шароитларда ишлашга мажбурламоқчи бўлган.
Мазкур ҳолат юзасидан консулхонага келиб тушган мурожаат асосида дипломатик ваколатхона ҳамда Миграция агентлигининг Туркиядаги вакиллиги томонидан тезкор чоралар кўрилган. Олиб борилган тадбирлар натижасида фуқаро соғ-омон ҳолда Ўзбекистонга қайтарилган. Ёлғон ваъдалар бериб, аёлни алдашга уринган шахснинг ҳаракатлари юзасидан Туркия ҳуқуқни муҳофаза қилувчи идораларига тегишли маълумот тақдим этилган.
Миграция агентлиги фуқароларни лицензиясиз хорижга ишга жўнатиш билан шуғулланаётган компаниялардан огоҳлантирганди.
Изоҳ (0)