Португалия терма жамоаси ҳужумчиси Криштиану Роналду Саудия Арабистонининг “Ан-Насср” клубида фаолиятини давом эттиришини маълум қилди.
Футболчи Миллатлар Лигаси финалидаги Испанияга қарши баҳсдан кейин ўзининг келажагига ойдинлик киритди:
Менинг келажагим? Аслида ҳеч нарса ўзгармайди. “Ан-Насср”да қоламанми? Ҳа, дея Роналду сўзларини келтиради журналист Фабрицио Романо.
Риёдликлар ва Роналду ўртасидаги тузилган амалдаги шартнома 30 июнь куни якунланади. Яқин кунларда футболчи клуб билан янги битим имзоланиши кутилмоқда.
Ўтган мавсумда Роналду “Ан-Насср”нинг барча мусобақалар доирасидаги 41 та ўйинида майдонга тушиб, ўз ҳисобига 35 та гол ва 4 та голли узатма ёздириб қўйган. Transfermarkt портали ҳужумчининг қийматини 12 миллион еврога баҳоламоқда.
Эслатиб ўтамиз, Роналду бошчилигидаги Португалия терма жамоаси Миллатлар Лигаси финалида Испаниядан устун келди (2:2, пенальтилар серияси — 5:3). Мазкур соврин Роналду учун терма жамоа билан қўлга киритилган учинчи йирик ғалаба бўлди. Бунгача у 2016 йилги Европа чемпионати ҳамда 2019 йилги Миллатлар Лигасида ҳам чемпионликни нишонлаган.
Изоҳ (0)