Хорватия терма жамоаси ярим ҳимоячиси Лука Модрич Жаҳон чемпионати саралаш босқичи Европа ўйинларида ўзига хос натижа қайд этди. У мазкур мусобақа тарихида гол урган энг ёши катта футболчига айланди.
Чехияга қарши ўйиннинг 62-дақиқасида Модрич пенальтидан аниқ зарба йўллаб, рақиб дарвозасини ишғол қилди. Лука бу голни 39 ёш 9 ойлик бўлганда киритди.
Қизиқ томони шундаки, аввалги рекорд атиги бир неча кун олдин янгиланган эди. 7 июнь, шанба куни босниялик ҳужумчи Эдин Жеко Сан-Марино дарвозасига гол уриб, шу натижани ўрнатган эди. Ўшанда Жеко 39 ёш, 2 ой ва 12 кунлик бўлган. Бу ўйин Жеконинг терма жамоадаги хайрлашув баҳси сифатида ўтказилганди.
Маълумот учун, Хорватия Чехияга қарши баҳсни 5:1 ҳисобида ўз фойдасига ҳал қилди. Айни пайтда чехлар гуруҳда 9 очко билан етакчилик қилаётган бўлса, улардан икки ўйин кам ўтказган Хорватия 6 очко билан 2-ўринда бормоқда.
Изоҳ (0)