Хорватиялик футболчи Лука Модрич мавсум якунлангач, “Реал”ни тарк этади. Шу боис мадридликлар унга ўринбосар қидирмоқда. Бу ҳақда Cadena Ser нашри хабар берди.
Унга кўра, клуб раҳбарияти “Челси” ярим ҳимоячиси Энцо Фернандеш ва “Байер” футболчиси Эксекиэл Паласиос Лука учун муносиб ўринбосар бўлади деб ҳисобламоқда. “Реал” бош мураббийлигига тайинланиши кутилаётган Хаби Алонсо бу борада муҳим рол ўйнаши мумкин. Айниқса, у Леверкузен клубида Паласиос билан бирга ишлаган ва уни қандай ҳолатда эканлигини яхши билади.
Шунингдек, “Реал” раҳбарияти Фернандешни қўлга киритиш имкониятини ҳам ўрганиб чиқмоқда. Агар “Челси” Конференциялар Лигаси финалида “Бетис”га ютқазса ҳамда Чемпионлар лигасига йўлланма ололмаса, Энцо лондонликлар сафини тарк этиши эҳтимоли ошиши кутилмоқда. Бу омиллар футболчининг келажагини ҳал қилишда муҳим рол ўйнаши мумкин. Аввалроқ Фернандеш “Челси”нинг сотилмайдиган футболчилар рўйхатида эканлиги айтилганди, бироқ футболчи кетишни истаса, раҳбарият уни сотиб юборишдан бошқа иложи қолмайди.
Маълумот учун, ушбу мавсум “Реал” ҳеч қандай соврин қўлга киритмади. Улар Испания Кубоги, Суперкубоги ҳамда Ла Лигада “Барселона”га имкониятни бой берган бўлса, Чемпионлар Лигасида “Арсенал”га мағлуб бўлиб, турнирни тарк этди.
Шу сабабли раҳбарият ёзда жиддий трансферларни амалга ошириб, яна совринлар қўлга киритишни истамоқда.
Изоҳ (0)