Мадриднинг “Реал” клуби ярим ҳимоячиси Лука Модрич инглиз клубларидан бири — “Суонси Сити” акцияларининг бир қисмига эгалик қилиши мумкин. Бу ҳақда футбол инсайдери Фабрицио Романо хабар бермоқда.
Манбага кўра, 39 ёшли хорватиялик футболчи билан келишув аллақачон якунланган ва у клуб акцияларининг кичик қисмини сотиб олади. Бу ҳолат Модричнинг фаолиятига таъсир қилмайди. У кейин ҳам “Реал” сафида ўйнашни давом эттиради.
Маълумот учун, Модрич аввалроқ Англия Премьер Лигасида тўп сурган. Ярим ҳимоячи 2008 йилдан 2012 йилгача “Тоттенҳэм” шарафини ҳимоя қилган. Кейин Мадриднинг “Реал” клуби билан шартнома имзолаб, кўплаб совринларга эга чиққан.
Модричнинг “қаймоқранглилар” билан амалдаги шартномаси 2025 йилнинг июнига қадар мўлжалланган. Хорватиялик футболчига Саудия клубларидан молиявий яхши таклиф бор, лекин футболчи фаолиятини “қироллик клуби” таркибида якунлашни мақсад қилган. Шу боис у клуб билан яна бир мавсумга мўлжалланган битим тузиш арафасида турибди.
Изоҳ (0)