Оила, машиналар ва антиқа севги қиссаси. «Олтин тўп» соҳиби Лука Модрич қандай ҳаёт кечиради?

Сўнгги йилларда Хорватия терма жамоаси ва «Реал» сафида барқарор ўйин кўрсатаётган кам сонли ўйинчилардан бири Лука Модрич аслида ўзига исталган нарсани раво кўра олса-да, ҳамкасблари ва жамоадошларига қараганда анчайин камтар ҳаёт кечиради. Бунинг сабаби эса Луканинг ёшлигида жуда кўплаб қийинчиликларни бошдан кечирганидир. Шундай бўлса-да, кўплаб инсонлар ҳавас қилса арзийдиган ҳаёт кечиради. Демак, қуйида «Олтин тўп–2018» мукофоти соҳиби Лука Модричнинг қандай ҳаёт кечириши ҳақида ҳикоя қиламиз.

Модрич қаерда яшайди?

Модрич 2012 йилда Ла Моралехага кўчиб ўтганида, у ерда унинг жамоадошлари кўпчиликни ташкил қиларди. Орадан 7 йил ўтиб, 2019 йилда Лука ўша ҳудуддан 12 миллион еврога ҳашаматли уй сотиб олди.

Уй жойлашган ҳудуд 10 минг квадрат метрни ташкил этади. Бинонинг ўзи эса 2700 квадрат метрни эгаллаган бўлиб, унда 9 ётоқхона ва худди шунча ювиниш хонаси бор. Шунингдек, ертўлада 18 ўринли кинотеатр, спорт зали ва 10 та автомобилга мўлжалланган гараж ҳамда массаж хонаси мавжуд.

Модрич қандай машиналарда юради?

Луканинг 10 та машинага мўлжалланган гаражи борлиги бежиз эмас, боиси у ҳайдаши мумкин бўлган машиналар талайгина.

Мисол тариқасида, Bentley Continental GT’ни келтириш мумкин. Бундай араваларнинг нархи 207 минг евродан бошланади.

Шунингдек, унинг гаражи турли хил Audi’лар билан лиқ тўла. Чунки немис компанияси ва «Реал Мадрид» кўп йиллардан бери ҳамкорлик  қилиб келади.

Модрич эса шу тариқа деярли ҳар йили Audi’дан янги автомобиль қабул қилади.

Модричнинг шаҳсий ҳаёти

Лука принципиал жиҳатдан кўпроқ футболга эътибор қаратади ва ўзига хос турмуш тарзини олиб боради. 2010 йилда у Ваня Босничга уйланди. Ваня ҳозир 37 ёшда бўлиб, у Лукадан уч ёшга катта. Жуфтлик ҳозирда уч нафар фарзандни вояга етказмоқда.

Уларнинг севги қиссаси тарихи жуда қизиқарли тарихига эга. Дастлаб, Ваня Модричнинг агенти бўлган, ўшанда Лука 21, Ваня эса 24 ёшда эди. Маълум вақт ўтиб эса ҳамкорлик муҳаббатга айланди ва 2010 йилга келиб, улар турмуш қурди. Marca нашри бир вақтлар Луканинг тунги клуб ва зиёфатларда деярли кўринмаслигини, бироқ ҳайвонот боғида эса уни топиш осонлиги ҳақида ёзганди. Футболчининг айтишича, энг яхши таътил – бу оилавий ҳордиқ чиқариш.

Лука узоқ вақт давомида, аниқроғи, 2012 йилнинг ёзидан бери «қаймоқранглилар» шарафини ҳимоя қилиб келади. Мадрид клуби Модрич учун «Тоттенҳэм»га 33 миллион фунт стерлинг тўлаганди. 2011 йилда Лука «тақачилар» сафида ҳафтасига атиги 45 минг фунт ишлаб топган бўлса, ҳозирда хорват ушбу муддат ичида 180 минг фунт олади. Шунингдек, «Реал» билан нақ 16 та совринни қўлга киритган Модричнинг уйида «Олтин тўп» соврини ҳам бор.