Ўзбекистонда 2024 йил 1 декабрдан ичимлик ва оқова сув хизматлари тўловлари фақат электрон шаклда қабул қилинади. Бу ҳақда “Ўзсувтаъминот” ахборот хизмати раҳбари Акмал Муродов эълон қилди.
Унинг билдиришича, соҳада шаффофликни таъминлаш ҳамда коррупцион ҳолатларга барҳам бериш мақсадида республика миқёсида ичимлик ва оқова сув хизматлари учун тўловларни фақат электрон шаклда қабул қилиш тизимига ўтилади.
Назоратчи ва сув таъминоти ходимларига тўловларни нақд пул кўринишида амалга ошириш тўхтатилади.
Қайд этилишича, сўнгги вақтларда соҳада бир қанча коррупциявий ҳолатлар аниқланган. Жумладан, тўловни нақд шаклда амалга ошириш билан боғлиқ бир қанча қонунбузилиш ҳолатлари кузатилган.
Ноябрь ойида Хоразм вилоятида ичимлик суви учун тўлов қилинган маблағларни ўзлаштириш ҳолатлари фош этилганди. “Х.С.Т.” АЖнинг Урганч, Қўшкўпир, Хива, Хонқа ва Гурлан туманлари филиали масъул шахслари истеъмолчилар томонидан ичимлик суви учун тўлов қилинган жами 380 миллион сўмни банк ҳисоб рақамларига кирим қилмаган. Улар пулларни ўзлаштириш йўли билан талон-торож қилгани аниқланган.
Изоҳ (0)