Шавкат Мирзиёев иссиқлик ва сув таъминоти соҳаларида кескин ўзгариш бўлмаётганини танқид қилди

Шавкат Мирзиёев уй-жой, қурилиш, коммунал хўжалиги, транспорт ва экология соҳаларида амалга оширилган ишлар ва устувор вазифалар юзасидан йиғилишда кўп қаватли уйларни бошқариш, иссиқлик ва сув таъминоти соҳаларида кескин ўзгариш бўлмаётганини танқид қилди.

Жумладан, аксарият кўп қаватли уйларда энергия сарфи хорижга нисбатан 3-4 баробар юқори, иссиқлик таъминоти тизимида энергия йўқотишлари кўп, тизимда бугунги кунга қадар бирор марта энергия аудити ўтказилмаган, дебитор қарздорлиги оқибатида иссиқлик корхоналари тизимни яхшилашга инвестиция киритмаяпти.

Уй-жой коммунал хўжалиги вазирлиги ва Энергетика вазирлигига кўп қаватли уйларда энергия тежаш бўйича алоҳида дастур амалга оширишни бошлаш топширилди.

Халқаро экспертлар жалб қилиниб, қаерда марказлашган, қаерда локал ёки индивидуал иситиш тизимини қўллаш, қайси қозонхоналарни когенерация технологиясига ўтказиш бўйича ҳар бир ҳудуднинг иссиқлик таъминоти схемаси ишлаб чиқилади.

Бугунги кунда ичимлик суви иншоотларининг айримлари талабга жавоб бермаслиги аниқланган. Шу муносабат билан сув сифати стандартларини тўлиқ янгилаб, уларни барча сув иншоотларида жорий қилиши шартлиги таъкидланди.

Мутасаддиларга камида 4 та лабораторияни жиҳозлаб, уларда ичимлик суви сифатини тўлиқ таҳлил қилишни йўлга қўйиш топширилди.

Шу билан бирга, ичимлик суви таъминоти тизимида ичимлик суви йўқотилаётгани, истеъмолчиларнинг 30 фоизида ҳалигача сув ҳисоблагичи ўрнатилмагани, тизимда ўғриликлар давом этаётгани танқид қилинди.

“Ўзсувтаъминот” шу кунга қадар бирорта йирик хусусий шериклик лойиҳасини амалга оширмагани, ичимлик суви етказиб бериш таннархини камайтириш бўйича бош қотирмаётгани айтиб ўтилди.

Аҳолини ичимлик суви билан таъминлашни кенгайтириш мақсадида тизим раҳбарларига қатор топшириқлар берилди.

Жумладан, тажриба тариқасида 5 та шаҳарда — Когон, Ширин, Янгиер, Бекобод ва Янгийўл шаҳарларида сув таъминотига хусусий шериклар жалб қилинади. Вилоят ҳокимларига эскирган насосларни янгилаш ишларини бошлаб, бу йил камида 1 мингта насосни энергия тежамкорига алмаштиришга топшириқ берилди.