“Ўзсувтаъминот” Хоразм вилоятида ичимлик суви ва оқова хизматлар бўйича 2024 йил 16 июндан амалда қўлланиладиган янги тарифлар тасдиқланганини эълон қилди.
Унга кўра, ушбу санадан нархлар қуйидагича ўзгаради (нархлар ҚҚСсиз):
Ичимлик суви:
- аҳоли учун 1 метр куб — 3 500 сўм;
- бюджет ташкилотлари учун 1 метр куб — 8 000 сўм;
- улгуржи истеъмолчилар учун 1 метр куб — 8 000 сўм;
Оқова сув хизмати:
- аҳоли учун 1 метр куб — 1 700 сўм;
- бюджет ташкилотлари учун 1 метр куб — 2 800 сўм;
- улгуржи истеъмолчилар учун 1 метр куб — 2 800 сўм.
Қайд этилишича, ўтган беш йилда Хоразм вилоятида марказлашган ичимлик суви билан таъминланиш даражаси 52,1 фоиздан 90,4 фоизга етказилди. 2024 йил якуни билан бу кўрсаткич 91,2 фоизга етказилиши кутилмоқда.
Европа тикланиш ва тараққиёт банкининг 150 млн доллар қийматида имтиёзли кредит маблағларини жалб қилиш эвазига вилоят аҳолисини ичимлик суви билан таъминловчи қуввати 200 минг метр кубли асосий Питнак ичимлик суви тозалаш иншоотини реконструкция қилиш ва қувватини 400 минг метр кубга етказиш (30 миллион доллар) кўзда тутилган.
Шунингдек, ичимлик суви манбасидан узоқ масофада бўлган Гурлан, Янгибозор, Шовот туманларини узлуксиз ичимлик суви билан таъминлаш мақсадида Гурлан туманида янги ичимлик суви тозалаш иншоотини қуриш, Урганч, Хива, Питнак канализация тизимларини реконструкция қилиш ва янгидан қуриш, Гурлан туманида канализация тизимларини барпо қилиш режалаштирилган.
Бундан ташқари, иш ҳақи, электр-энергия, солиқ тўловлари, хорижий кредитлар тўлови амалга оширилган бўлиб, жорий ва капитал таъмирлаш, тизимни модернизация қилиш ишларида ҳам сарф-харажатлар талаб этилади.
Шулардан келиб чиқиб ичимлик суви ва оқова хизматлар бўйича янги тарифлар тасдиқланди.
Изоҳ (0)