Ўзбекистонда сўнгги 7 йилда аҳолининг ичимлик суви таъминотини яхшилашга 20 триллион сўмга яқин маблағ йўналтирилди. Бу ҳақда “Ўзсувтаъминот” ахборот хизмати раҳбари Акмал Муродов маълум қилди.
Унинг қайд этилишича, бу сўнгги 25 йилга нисбатан 8 баравар кўпдир.
Бу маблағлар ҳисобидан 2 916 та сув иншооти ва 43 минг километрга яқин ичимлик суви тармоқлари тортилди. Натижада аҳолининг марказлашган ичимлик суви билан таъминланганлик даражаси 2017 йилда 63 фоизни ташкил этган бўлса, бугунга келиб ушбу кўрсаткич 77 фоизга етказилди.
Ушбу давр мобайнида 8 миллионга яқин аҳоли илк бор марказлашган ичимлик суви билан таъминланиб, 14,5 миллион нафар аҳолининг ичимлик суви таъминоти яхшиланди.
Бундан ташқари, истеъмолчилар учун такомиллаштирилган шахсий кабинет жорий этилиб, у орқали истеъмолчилар тўловлар ҳисоботини ойлар, йиллар кесимида кўриб бориши, шу ернинг ўзида тўловни амалга ошириши ва ҳисоблагичлар маълумотларини киритиши имкони яратилди.
“Ўзсувтаъминот” ахборот хизмати раҳбарининг таъкидлашича, сув сувтекин бўлиши керак эмас.
“Ичимлик суви тарифлари арзонлиги ундан хўжасизларча фойдаланиш, ичимлик сувига беписандлик билан муносабатда бўлиш омилларидан бири ҳисобланади”, — дейди Акмал Муродов.
2024 йил январь ҳолатига кўра, аҳолининг марказлашган ичимлик суви билан таъминлангганлик даражаси 77,2 фоизни ташкил этади.
- Андижон — 90,0 фоиз;
- Бухоро — 73,2 фоиз;
- Фарғона — 79,4 фоиз;
- Жиззах — 70,4 фоиз;
- Навоий — 84,7 фоиз;
- Наманган — 82,7 фоиз;
- Қашқадарё — 59,4 фоиз;
- Самарқанд — 75,4 фоиз;
- Сурхондарё — 62,9 фоиз;
- Сирдарё — 86,9 фоиз;
- Тошкент вилояти— 79,4 фоиз;
- Хоразм — 90,4 фоиз;
- Тошкент шаҳри — 97,7 фоиз;
- Қорақалпоғистон Республикаси — 72,4 фоиз.
“Ўзсувтаъминот” маълумотидан кўриш мумкинки, аҳолиси ичимлик суви билан таъминланганлик даражаси энг паст ҳудуд Қашқадарё вилояти бўлиб турибди. “Ўзсувтаъминот” бошқаруви раиси ўринбосари ҳудудда ичимлик суви таъминоти қамровини кенгайтиришга қаратилган ислоҳотлар бир дақиқага ҳам тўхтамаганини айтганди.
Изоҳ (0)