Андижонда ҳам ичимлик суви ва оқова хизматлар нархи оширилади

Андижон вилоятида ҳам ичимлик суви ва оқова хизматлар бўйича янги тарифлар тасдиқланди. Бу ҳақда “Ўзсувтаъминот” матбуот хизмати хабар берди.

19 сентябрда тасдиқланган тарифларга кўра, нархлар қуйидагича ўзгаради:

Ичимлик суви:

• аҳоли учун 1 м³ — 1 500 сўм (амалдаги нарх 750 сўм);
• бюджет ташкилотлари учун 1 м³  — 2 400 сўм (амалдаги нарх 1 200 сўм);
• улгуржи истеъмолчилар учун 1 м³ — 3 800 сўм (амалдаги нарх 1 800 сўм);

Оқова сув хизмати учун:

• аҳоли учун 1 м³— 1 000 сўм (амалда 750 сўм);
• бюджет ташкилотлари учун 1 м³ — 2 400 сўм (амалда 1 200 сўм);
• улгуржи истеъмолчилар учун 1 м³   — 3 200 сўм (амалда 1 600 сўм).

Тасдиқланган тарифлар 15 кундан кейин кучга киради.

“Хонобод шаҳридан Андижон шаҳри-ю, Улуғнор туманигача катта электр энергияси сарфи ҳисобига йирик қувур орқали 150-200 километргача сув ҳайдаб, ҳатто энг чекка ҳудуддаги хонадонларгача олиб кириб, 1 м3 (тонна) сув учун 750 сўм тўланг, деса оғринамиз-у, лекин дўконга кириб 1 литр ҳажмдаги ичимлик сув учун 3-4 минг сўм тўлашга оғринмаймиз. Тасаввур қилинг, дўкондаги 1 литр сув 3-4 минг сўм, минг машаққат билан келадиган жўмракдаги 1 м3 (тонна) сув эса 750 сўм. Бундан ортиқ арзончилик борми?” — дейилади “Ўзсувтаъминот”нинг тўловлар қиймати оширилиши ҳақида берган изоҳида.

Қайд этилишича, шу арзончилик туфайли ҳудудларни сувлаштириш, истеъмолчиларга сифатли хизмат кўрсатиш даражаси кўнгилдагидек эмас. Чунки истиқболли лойиҳаларни амалга ошириш фойдаланилган тоза ичимлик суви ҳамда кўрсатилган оқова сув хизмати учун тўловлар ҳисобига амалга оширилади.

Шу сабабли ҳам Халқ депутатлари Андижон вилоят кенгашининг 19 сентябрдаги қарорига асосан Андижон вилоятида фойдаланилган тоза ичимлик суви ҳамда кўрсатилган оқова сув хизматлари учун тўловлар қиймати ўзгартириладиган бўлди.

Бундан аввал Қашқадарё, Сурхондарё ва Тошкент вилоятида ичимлик суви ва оқова хизматлар бўйича янги тарифлар тасдиқланганди.