Тошкент шаҳрига хизмат кўрсатувчи оқова сув тозалаш иншоотлари ҳолатини яхшилаш ва оқова сувларга зарарли ташламалар оқизилишини тўхтатиш бўйича Идоралараро ишчи гуруҳи тузилди, деб хабар бермоқда “Ўзсувтаъминот” матбуот хизмати.
Қайд этилишича, сўнгги йилларда оқова сув иншоотлари фаолиятидан ҳақли тарзда норози бўлиб мурожаат қилаётганларнинг сони ортди. Чунки, бугун оқова сув тармоқларига (канализация) ташланаётган саноат чиқиндилари ва уларда келаётган зарарли кимёвий моддалар миқдори кескин ошди. Оқова сув иншоотларининг техник, технологик имокониятларига тўғри келмайдиган бундай юкламалар эса тозалаш жараёнларининг издан чиқишига ҳамда турли санитария ва экологияга оид салбий вазиятларнинг юзага келишига сабаб бўлмоқда.
Бу каби ҳолатларнинг олдини олиш, аҳолини норози қилаётган нохушликларга барҳам бериш мақсадида турли чора-тадбирлар қўлланилди, сўнгги чора сифатида корхоналарни оқова сув тармоқларидан узишгача борилди. Бироқ бу каби саъй-ҳаракатлар бир тарафнинг манфаатига хизмат қилса, албатта, иккинчи тарафнинг норозилигига сабаб бўлди.
Эндиликда бугунги вазият ушбу йўналишдаги ишларни янада такомиллаштиришни тақозо этмоқда. Шундан келиб чиқиб, Тошкент шаҳрига хизмат кўрсатувчи оқова сув тозалаш иншоотлари ҳолатини яхшилаш ва оқова сувларга зарарли ташламалар оқизилишини тўхтатиш бўйича идоралараро ишчи гуруҳи тузилди ва унинг вазифалари белгиланди.
Унга кўра эндиликда сув ва оқова сувларни тозалаш иншоотларида жорий ҳолатни, технологик жараёнларга риоя этилиш даражасини ҳамда уларни такомиллаштириш, ичимлик сув таъминоти ва оқова сувларни тозалаш тизимларида комплекс автоматлаштирилган мониторинг механизими таклифи ишлаб чиқилади. Тадбиркорлик субъектларини локал сув тозалаш иншоотларини қуриш ва модернизация қилишга рағбатлантириш мақсадида ушбу харажатларни субсидиялаш тизими жорий этилади.
Хўжалик юритувчи субъектлар томонидан экологик меъёрларга риоя этилишини самарали назорат қилиш ва табиатга саноат фаолиятининг зарарли ва заҳарли ташламалар шаклидаги салбий таъсирини олдини олиш мақсадида атмосфера ва сувга ташламаларни текшириш тартиби такомиллаштирилади. Бундан ташқари ишчи гуруҳ зиммасига яна қатор вазифалар юклатилди.
Қурилиш ва уй-жой коммунал хўжалиги, Сув хўжалиги, Экология ва атроф-муҳитни муҳофаза қилиш ва иқлим ўзгариши, Адлия, Рақамли технологиялар вазирликлари, шунингдек, Санитария-эпидемиологик осойишталик ва жамоат саломатлиги қўмитаси, Тошкент шаҳар ҳокимлиги, “Ўзсувтаъминот” АЖ кабилар белгиланган вазифаларни тўла бажарилишида ўзларига тегишли бўлган жиҳатларни таъминлашни ўз зиммасига олади.
Жараёнлар назорати эса Бош прокуратура томонидан олиб борилади.
Изоҳ (0)